गणेश जाधव स्पर्धेत सर्वोत्तम
म. टा. क्रीडा प्रतिनिधी, मुंबई
ठाणे-कल्याणच्या शिवशंकर क्रीडा मंडळाने बंड्या मारुती क्रीडा मंडळाने आयोजित केलेल्या राज्यस्तरीय कबड्डी स्पर्धेत जेतेपद पटकाविले. शिवशंकर मंडळाचा गणेश जाधव हा स्पर्धेतील सर्वोत्तम खेळाडू ठरला. अंतिम सामन्यात शिवशंकरने विजय क्लबचा कडवा प्रतिकार २८-२०असा मोडून काढत एकावन्न हजार रुपये व चषकावर नाव कोरले. उपविजेत्या विजय क्लबला चषक व पस्तीस हजार रुपयांवर समाधान मानावे लागले.
उभय संघांनी मध्यांतरापर्यंत एकमेकांचा अंदाज घेत खेळ केला. दोन्ही संघ १०-१० असे बरोबरीत होते.मध्यांतरानंतर मात्र सामन्यात खरी चुरस पहायला मिळाली. मध्यांतरानंतर शिवशंकर मंडळाचे "प्रो-कबड्डी" स्टार श्रीकांत जाधव, निलेश साळुंखे यांनी अनुभव पणाला लावत चढाईत गुण घेतले, तर अनुभवी सूरज बनसोडे, तुषार भोईर यांनी आक्रमक पकडी करीत विजय क्लबवर पहिला लोण चढविला. सामन्यातील हा एकमेव लोण. शिवशंकरचा बचाव एवढा भक्कम होता की, विजय क्लबच्या चढाईपट्टूना गुण मिळविणे जड जात होते. विजय दिवेकरचा अष्टपैलू खेळ,अमित चव्हाणच्या चढाया आणि सुनील पाटीलच्या पकडी विजय क्लबला विजय मिळवून देण्यात कमी पडल्या. स्पर्धेतील उत्कृष्ट चढाई व पकड या दोन्ही पारितोषिकांचा मान विजय क्लबच्या दोन खेळाडूंनी मिळविला.स्पर्धेतील उत्कृष्ट चढाईचे पारितोषिक अमित चव्हाण, तर उत्कृष्ट पकडीचे पारितोषिक विजय दिवेकर यांनी पटकाविले.
उपांत्य फेरी निकालः शिवशंकर विजयी वि. जय भारतला ४१-२०. दुसरा सामन्याचा निकाल 'सुवर्ण चढाईवर' लागला. त्यात विजय क्लबने २२-२२ आणि ५-५ चढायांच्या डावात २७-२७(५-५)अशा बरोबरी नंतर स्वस्तिक मंडळावर बाजी मारली. विजय क्लबच्या विजय दिवेकरने सुवर्ण चढाईत गडी टिपत संघाला अंतिम फेरीत नेले.