पंचेचाळीसाव्या कोल्हापूर परीक्षेत्रीय पोलिस क्रीडा स्पर्धेत बुधवारी क्रॉसकंट्री क्रीडा प्रकारामध्ये पुरुष व महिला गटांत सांगली पोलिसांनी सर्वसाधारण विजतेपद पटकावले. तर दोन्ही विभागांत कोल्हापूर पोलिस संघाला उपविजेतेपदावर समाधान मानावे लागले. १०० मीटर स्पर्धेत कोल्हापूरच्या सिद्धेश्वर रायगोंडा व मीनाक्षी पाटील यांनी प्रथम क्रमांक पटकावला.गेल्या चार दिवसांपासून पोलिस कवायत ग्राउंडवर पोलिस क्रीडा स्पर्धा सुरू आहेत. बुधवारी क्रॉसकंट्रीच्या स्पर्धा झाल्या. १०० मीटर स्पर्धेतील महिला विभागात मीनाक्षी पाटीलने ३७.५२ सेकंद वेळ नोंदवत प्रथम क्रमांक पटकावला. तर सांगलीच्या जयश्री गायकवाडने ४४.५८ सेकंद वेळेची नोंद करत द्वितीय क्रमांक पटकावला. सुनीता पाटील, भागश्री वडर, मीनाताई देसाई व ज्योती चव्हाण यांनी अनुक्रमे तीन ते सहा क्रमांक पटकावले.
पुरुषांच्या १०० मीटर स्पर्धेत कोल्हापूरच्या सिद्धेश्वर रायगोंडाने ३६.५२ सेकंद वेळ देत प्रथम तर ३८.२६ सेकंदांसह सांगलीच्या शेखर तराटेने द्वितीय क्रमांक मिळवला. नीलेश सूर्यवंशी तृतीय, अप्पासो कुंभारे चतुर्थ व अमर जाधव यांनी पाचवा क्रमांक मिळवला.चार बाय ४०० मीटर स्पर्धेत सांगली संघाने प्रथम, कोल्हापूर द्वितीय तर सातारा संघाने तृतीय क्रमांक पटकावला. सांगली संघात अविनाश लाड, अनिल ऐनापुरे, विवेक साळोखे, विनायक सुतार यांचा समावेश होता. कोल्हापूर संघात अमृत तिवले, कृष्णा पाटील, प्रकाश पाटील, आकास व्हरांबळे तर सातारा संघात वैभव पवार, तानाजी शिंदे, प्रसाद जाधव, आशिष बनसोडे यांचा समावेश होता. चार बाय ४०० मीटर महिला गटात कोल्हापूर संघाने प्रथम, सांगली द्वितीय व सातारा संघाने तृतीय क्रमांक मिळवला. हॅमर थ्री पुरुष विभागात संतोष जाधव (प्रथम, सांगली), मोहसीन मोमीन (द्वितीय, सातारा) अमोल यादव (तृतीय, सोलापूर शहर) यांनी यश मिळवले.