Video : बॉलिवूडच्या गाण्यांवर सिंधूचा भन्नाट डान्स; व्हिडिओ झाला व्हायरल

पुणे : भारताची फुलराणी स्टार बॅडमिंटनपटू पी.व्ही.सिंधूने टोकियो ऑलिम्पिकमध्ये कांस्य पदक पदक जिंकल्याचा आनंद देशभरात साजरा केला जात आहे. बुधवारी (१८ ऑगस्ट) सिंधूने सुचित्रा बॅडमिंटन अकादमीमध्ये हजेरी लावली. त्यावेळी तिथे तिने जोरदार डान्स केला. याचा व्हिडिओ सध्या सोशल मीडियात धुमाकूळ घालत आहे.बॉलिवूड तसेच साउथ इंडियन गाण्यांवर सिंधूने तिच्या सहकाऱ्यांसोबत मनमोकळेपणाने डान्स केला. स्टायलिश लूकमध्ये सिंधू पार्टीमध्ये आली होती. आणि अॅकॅडमीत येऊन तिने डान्स करत या पार्टीला चार चाँद लावले. या आधी सिंधूला नाचताना कुणी पाहिलं नव्हतं. त्यामुळे अनेकांना आश्चर्याचा धक्का बसला आहे.

टोकियो ऑलिम्पिकमध्ये कांस्य पदक जिंकण्यात अॅकॅडमीमधील सर्व खेळाडूंचा मोठा वाटा आहे. या सहकाऱ्यांबरोबरच तिने अनेकवेळा बॅडमिंटन कोर्टवर सराव केला आहे. त्याचं फळ तिला मिळालं आहे. त्यामुळे आपल्या संघातील सहकाऱ्यांसाठी सिंधूने एका छोट्या पार्टीचं आयोजन केलं होतं. पार्टीमध्ये सिंधूने बॉलिवूड चित्रपटातील 'तुने मारी एन्ट्री', हरियाणाची प्रसिद्ध नर्तिका सपना चौधरीच्या 'तेरी आख्या का यो काजल', सबसे आगे होंगे हिंदुस्थानी या गाण्यांवर ठेका धरला.

दरम्यान, टोकियो ऑलिम्पिकहून मायदेशी परतलेल्या सिंधूचे जंगी स्वागत करण्यात आलं. स्वातंत्र्यदिनी ऑलिम्पिकमध्ये सर्व सहभागी खेळाडूंना लाल किल्ल्यावर आमंत्रित करण्यात आलं होतं, त्यात सिंधूचा समावेश होता. त्यानंतर पंतप्रधान नरेंद्र मोदी यांनी सिंधूला आईस्क्रीम खाऊ घालण्याचं वचनही पूर्ण केलं.

आता वर्ल्ड चॅम्पियनशिपमध्ये जेतेपद पटकावण्याचं तिचं लक्ष्य लागलं आहे. स्पेनमध्ये जागतिक बॅडमिंटन अजिंक्यपद स्पर्धेचं आयोजन करण्यात येणार आहे. जेतेपद कायम राखण्यासाठी सिंधू उत्सुक आहे.