Tokyo Olympics 2020 : टोकियो ऑलिम्पिक उद्घाटन सोहळ्याची क्षणचित्रे

टोकियो : टोकियो ऑलिम्पिकला धुमधडाक्यात सुरवात झाली. जगभरातील विविध देशांच्या खेळाडूंची पथके आपला राष्ट्रीय ध्वज घेऊन स्टेडियममध्ये पोहोचली होती. भारतीय खेळाडूंचे पथक ज्यावेळी स्टेडियममध्ये दाखल झाले तेव्हा तमाम भारतीयांचा उत्साह गगनात मावेनासा झाला होता. हॉकी संघाचा कर्णधार मनप्रीत सिंह आणि बॉक्सर मेरी कोम हातात तिरंगा घेऊन भारताचे प्रतिनिधित्व करत होते.

वाचा- Video : पाकिस्तानसह इतर दोन देशांकडून ऑलिम्पिकच्या उद्घाटन सोहळ्याला गालबोट

डोळे दीपवणारी आतषबाजी
संपूर्ण जगभरातील क्रीडा प्रेमी उद्घाटन सोहळ्याचा नजारा पाहण्यासाठी आतुरतेने वाट पाहत बसले होते. डोळे दीपवणारी आतषबाजी कॅमेऱ्यात कैद करण्यासाठीही अनेकजण आसुसलेले होते. ज्या प्रकारे ऑलिम्पिकचं उद्घाटन झालं, ते पाहून टोकियोवासियांनी सर्वांचं मन जिंकलं.


स्टेडियमच्या चोहोबाजूंनी आतषबाजी आणि सप्तरंगी रोषणाई होत होती. यामध्ये पूर्ण स्टेडियम न्हाऊन निघालं.


वाचा- Tokyo Olympics: उद्या (२४ जुलै) भारत पदक जिंकणार का? असे आहे वेळापत्रक

देशभरातील 130 कोटी भारतीय ज्या क्षणाची वाट पाहत होते तो क्षण आला. भारताची शान तिरंगा ध्वज अभिमानाने फडकवत भारतीय पथक टोकियोच्या नॅशनल स्टेडियममध्ये दाखल झाले. केंद्रीय क्रीडा मंत्री अनुराग ठाकूर हेदेखील आपल्या खेळाडूंचे मनोबल वाढविण्यासाठी उद्घाटन सोहळ्यावेळी उपस्थित होते.


उद्घाटन सोहळ्यावेळी जपानी संस्कृतीचे दर्शन घडले. यावेळी जगाला एकजुटीचा, समानतेचा आणि भेदभाव न करण्याचा संदेश जगाला देण्यात आला. यावेळी पुढे जात राहण्याचा संदेश देणारी ऑलिम्पिक थीमही स्टेडियममध्ये आणण्यात आली होती.


जपानचा राष्ट्रीय ध्वज घेऊन आलेल्या आठ मुलांनी तो ध्वज खेळाडूंकडे सुपूर्त केला. त्यानंतर जपानचे राष्ट्रगीत लावण्यात आले.


उद्घाटन सोहळ्यात भारताच्या 22 खेळाडू आणि 6 अधिकाऱ्यांनी भाग घेतला होता. हॉकीमधील 1, बॉक्सिंगच्या 8, टेबल टेनिसच्या 4, रोईंगच्या दोन, नौकानयनच्या 4 आणि जिन्मॅस्टिक, जलतरण आणि तलवारबाजीच्या प्रत्येकी एका खेळाडूने सहभाग नोंदवला होता.



क्रीडामंत्री अनुराग ठाकूर यांच्यासह क्रीडा राज्यमंत्री निसिथ प्रामाणिक यांनी या उद्घाटन सोहळ्याचा आनंद घेतला. यावेळी माजी ऑलिम्पिकपटू भारतीय पथकाचा उत्साह वाढविण्यासाठी उपस्थित होते.

पंतप्रधान नरेंद्र मोदींनीही उद्घाटन सोहळ्याचा आनंद घेतला. पंतप्रधान कार्यालयात लाईव्ह स्ट्रीमिंगवेळी त्यांनी उठून उभे राहत टाळ्या वाजवत भारतीय पथकाचे अभिवादन केले. भारतीय हॉकी संघाचा कर्णधार मनप्रीत सिंह आणि दिग्गज महिला बॉक्सर मेरी कोम यांनी पथकाचं नेतृत्व केलं. ते दोघे हातात तिरंगा धरून पथकापुढे चालत होते, तर इतर सदस्य आपापल्या हातात तिरंगा घेऊन मागे चालत होते.