...म्हणून मेरी निखतवर चिडली
गुवाहाटी : इंडिया ओपन बॉक्सिंग स्पर्धेत उपांत्य फेरीत निखत झरीनला पराभूत करून भारताची आघाडीची खेळाडू मेरी कोमने अंतिम फेरीत धडक मारली, पण निखतचे एक वक्तव्य तिला चांगलेच खटकले. उपांत्य फेरीत खेळण्यापूर्वी निखत म्हणाली होती की, मेरी ही माझी आदर्श आहे पण तिला आव्हान देताना मला डोके शांत ठेवावे लागेल. गेल्यावेळेस मी तिच्याविरुद्ध खेळले तेव्हा मला दडपण जाणवत होते, पण ती आव्हानात्मक लढत झाली होती. पण यावेळी मी चांगली टक्कर देईन.
निखतच्या या वक्तव्यावर मेरी रागावली. निखतविरुद्धची उपांत्य लढत जिंकल्यावर ती म्हणाली की, जर मी तिची आदर्श खेळाडू आहे तर ती मला आव्हान देण्याची भाषा कशी करते? माझ्याशी खेळण्याची संधी त्यांना मिळते आहे. केवळ एखादे आंतरराष्ट्रीय पदक जिंकल्यावर हे खेळाडू अशी भाषा करू शकत नाहीत. मी नेहमीच माझी गुणवत्ता सिद्ध केली आहे.
या उपांत्य लढतीत निखतने अर्थातच कडवी झुंज दिली पण अखेर अनुभवाच्या जोरावर शेवटच्या फेरीत मेरीने बाजी मारली.