म. टा. प्रतिनिधी, औरंगाबाद
आंतरशालेय क्रीडा स्पर्धांमध्ये ४९ क्रीडा प्रकारांचा समावेश असला तरी शासन निर्णयातील तरतुदीनूसार केवळ १३ राज्य क्रीडा संघटना पात्र ठरल्या आहेत. त्यामुळे तब्बल ३६ क्रीडा प्रकारांतील खेळाडू ग्रेस गुणांपासून वंचित राहण्यार आहेत. प्रस्ताव दाखल करण्यासाठी २० मेपर्यंतची मुदत संबंधित क्रीडा संघटनांना देण्यात आली आहे.
क्रीडा विभागाने राज्यातील सर्व जिल्हा क्रीडा अधिकाऱ्यांना एका लेखी पत्राद्वारे १३ राज्य क्रीडा संघटनांची माहिती दिली आहे. त्यात महाराष्ट्र अॅथलेटिक्स असोसिएशन, महाराष्ट्र अॅम्युचर बॉक्सिंग असोसिएशन, सायकलिंग असोसिएशन ऑफ महाराष्ट्र, महाराष्ट्र स्टेट फेन्सिंग असोसिएशन, द वेस्टर्न इंडिया फुटबॉल असोसिएशन, महाराष्ट्र ज्युदो असोसिएशन, महाराष्ट्र स्टेट टेबल टेनिस असोसिएशन, ऑल महाराष्ट्र वुशू असोसिएशन, महाराष्ट्र सेपक टकरॉ असोसिएशन, महाराष्ट्र टेनिक्वाइट असोसिएशन, महाराष्ट्र अॅम्युचर मल्लखांब असोसिएशन, महाराष्ट्र स्टेट सॉफ्टबॉल असोसिएशन, ऑल मराठी चेस असोसिएशन अशा तेरा राज्य क्रीडा संघटना शासन निर्णयातील तरतुदीनूसार पात्र ठरल्या आहेत.
एकविध खेळांच्या राष्ट्रीय, फेडरेशनची मान्यता प्राप्त यादीही पाठवण्यात आली आहेत. त्यात तेराच क्रीडा प्रकारांचा समावेश आहे. अदिल सुमारीवाला, अजय सिंग, परमिंदरसिंग धिंडसा, राजीव मेहता, प्रफुल्ल पटेल, प्रतापसिंह बाजवा, दुष्यंत चौटाला, भुपेंदरसिंग बाजवा, एस. आर. प्रेमराज, रुपाराम धनदेव, रमेश आर. इंदोलिया, गुरमितसिंग सोधी, पी. आर. व्यंकटरमा राजा यांच्या अध्यक्षतेखालील राष्ट्रीय संघटना मान्यता प्राप्त आहेत.
शालेय क्रीडा स्पर्धांमध्ये ४९ क्रीडा प्रकारांच्या एकविध खेळांच्या राज्य संघटनांना क्रीडा गुणांसाठीचे प्रस्ताव सादर करण्याबाबत सुचित करण्यात आले होते. त्यानूसार एकूण २३ खेळांच्या एकविध राज्य संघटनांनी प्रस्ताव क्रीडा संचालनालयास प्राप्त झाले. त्यापैकी १३ खेळांच्या एकविध राज्य संघटना शासन निर्णयातील तरतुदीनूसार पात्र ठरल्या आहेत. उर्वरित १० खेळांच्या एकविध राज्य संघटनांना त्रुटींची पुर्तता करण्याचे सांगण्यात आले आहे. तसेच ज्या एकविध राज्य क्रीडा संघटनांनी अद्याप प्रस्ताव सादर केलेले नाहीत अशा राज्य संघटनांनी तातडीने प्रस्ताव दाखल करण्याबाबत सांगण्यात आले आहे. दहावी व बारावीतील खेळाडूंना क्रीडा गुणांची सवलत मिळण्याकरिता अटींची पुर्तता करणे आवश्यक आहे. संबंधितांनी २० मेपर्यंत विभागीय शिक्षण मंडळांना क्रीडा गुणांची शिफारस केलेल्या खेळाडूंची यादी सादर करावी असे आवाहन क्रीडा विभागातर्फे करण्यात आले आहे.