- दिगंबर शिंगोटे
वयाच्या सहाव्या-सातव्या वर्षी फिटनेसच्या दृष्टीने वैष्णवीने टेनिसचा श्रीगणेशा केला. अर्थात, एक 'अॅक्टिव्हिटी' म्हणून टेनिसला प्रारंभ केला होता. नवव्या-दहाव्या वर्षी तिने स्पर्धांमध्ये भाग घ्यायला सुरुवात केली. अखिल भारतीय मानांकन चॅम्पियनशिप सीरिजमधील १२ वर्षांखालील मुलींच्या गटाचे जेतेपद पटकावले. ते तिचे पहिले जेतेपद ठरले. त्यानंतर एकामागून एक स्पर्धांत ती यश मिळवित गेली. त्यातूनच तिचा हुरुप आणि आत्मविश्वास वाढत गेला. तिने मेहनत खूप घेतली. ती चौदा वर्षांखालील मुलींत 'एआयटीए' क्रमवारीत अव्वल स्थानावर पोचली होती. आता ती सोळा वर्षांखालील मुलींतही अव्वल स्थानावर पोहोचली. ज्युनिअर फेड कप स्पर्धेसाठी वैष्णवीची भारतीय संघात निवड झाली आहे; तसेच वैष्णवीने नुकतीच रोलँ गॅरो ज्युनियर वाइल्ड कार्ड सीरिज स्पर्धा जिंकून पॅरिसचे तिकिटही निश्चित केले. आता पॅरिसमध्ये होणाऱ्या पात्रता स्पर्धेद्वारे वैष्णवी फ्रेंच ओपन ज्युनियर स्पर्धेला पात्र ठरण्यासाठी उत्सुक आहे.
वैष्णवीचे यश
- फेब्रुवारी २०२० मध्ये दिल्लीत झालेल्या रोलँ गॅरो ज्युनियर वाइल्ड कार्ड सीरिज स्पर्धेतील मुलींच्या एकेरी गटात विजेतेपद.
- जानेवारी २०२० मध्ये पुण्यात झालेल्या अखिल भारतीय मानांकन नॅशनल सीरिज टेनिस स्पर्धेतील १६ वर्षांखालील मुलींच्या एकेरी आणि दुहेरी गटात विजेतेपद.
- डिसेंबर २०१९ मध्ये कर्नाल येथे झालेल्या अखिल भारतीय मानांकन सुपर सीरिज स्पर्धेतील १६ वर्षांखालील मुलींच्या एकेरी गटात जेतेपद.
- नोव्हेंबर २०१९ मध्ये चंडीगडला झालेल्या अखिल भारतीय मानांकन सुपर सीरिज स्पर्धेतील १६ आणि १८ वर्षांखालील मुलींच्या एकेरी स्पर्धेत जेतेपद; तसेच १८ वर्षांखालील मुलींत दुहेरी स्पर्धेतही जेतेपद.
- सप्टेंबर २०१९ मध्ये अहमदाबादला झालेल्या अखिल भारतीय मानांकन नॅशनल सीरिज स्पर्धेतील १६ वर्षांखालील मुलींच्या गटात जेतेपद.
- ऑगस्ट २०१९ मध्ये कर्नालला झालेल्या सुपर सीरिज स्पर्धेतील १६ वर्षांखालील मुलींच्या एकेरी आणि दुहेरी गटांत जेतेपद.
- फेब्रुवारी २०१९ मध्ये चंडीगडला झालेल्या सुपर सीरिज स्पर्धेतील १६ वर्षांखालील मुलींच्या एकेरी गटात जेतेपद; तसेच १८ वर्षांखालील मुलींच्या दुहेरी गटातही जेतेपद.
- ऑगस्ट २०१८ मध्ये हैदराबादला झालेल्या नॅशनल सीरिज स्पर्धेतील १४ वर्षांखालील मुलींच्या एकेरी आणि दुहेरी गटात विजेतेपद.
- जुलै २०१८ मध्ये गुवाहाटीला झालेल्या सुपर सीरिज स्पर्धेतील चौदा वर्षांखालील मुलींच्या एकेरी गटात जेतेपद.
- मे २०१८ मध्ये पाचगणीला झालेल्या नॅशनल सीरिज स्पर्धेतील चौदा वर्षांखालील मुलींच्या एकेरी आणि दुहेरी गटात जेतेपद.
- एप्रिल २०१८ मध्ये बेंगळुरूला झालेल्या सुपर सीरिज स्पर्धेतील १६ वर्षांखालील मुलींच्या एकेरी गटात जेतेपद.
वैष्णवी आक्रमक खेळते. चेंडू जोरात मारते; पण तिचे नियंत्रण उत्तम असते. तिचे मनोबल चांगले आहे. शेवटच्या क्षणापर्यंत ती लढत सोडत नाही. प्रतिस्पर्ध्याला ती सहज गुण देत नाही. आंतरराष्ट्रीय स्तरावर ती खूप खेळलेली नाही. मात्र, जेवढी ती खेळेल, तेवढा तिचा अनुभव वाढत जाईल आणि तिचा खेळ अधिकाधिक चांगला होईल.
- केदार शहा, प्रशिक्षक
वैष्णवी निहार आडकर
खेळ : टेनिस
जन्मतारीख : १४ डिसेंबर २००४
शिक्षण : अभिनव विद्यालय (इयत्ता नववी)
सराव : रोज चार तास सराव (३ तास टेनिस आणि १ तास फिटनेस)
प्रशिक्षक : केदार शहा
शैली : आक्रमक, ताकदवान फटके
लक्ष्य : पुढील वर्षभरात ज्युनियर गटाच्या जागतिक क्रमवारीत पहिल्या दोनशे जणींत येणे.
---