युसूफमुळे भारताचा विजय

वृत्तसंस्था, मेलबर्न

तरणाबांड स्ट्रायकर अफान युसूफच्या दोन गोलमुळे भारताने जगज्जेत्या ऑस्ट्रेलियावर मंगळवारी ३-२ असा विजय मिळला. सध्या ऑस्ट्रेलिया दौऱ्यावर असलेला भारतीय संघ येथे दोन सामन्यांची मालिका खेळणार आहे. भारताचा तिसरा गोल केला तो ड्रॅगफ्लिकर व्ही. आर. रघुनाथने. ऑस्ट्रेलियातर्फे गोल केले ते मॅथ्यू विलिस (३६वे मिनीट) व ट्रेंट मिटन (४३) यांनी.

ऑस्ट्रेलियन संघ चपळ आणि वेगवाग हॉकीत पटाईत आहेत हे एव्हाना लक्षात आलेल्या भारतीय संघाने, मंगळवारी त्यांच्यावर कडी करण्यासाठी सुरुवातीपासून आपल्या आक्रणाची धार वाढवली होती. ऑस्ट्रेलियाला गोल करण्याच्या फारशा संधी मिळणार नाहीत अन् यासाठी त्यांच्याकडे खूपवेळ चेंडूचा ताबा द्यायचा नाही, या हिशेबाने भारताने खेळ केला. दरम्यान १९व्या मिनिटाला युसूफने फील्ड गोल करून भारताला आघाडी मिळवून दिली. याच्या अगदीच पुढील मिनिटाला युसूफने ऑस्ट्रेलियन खेळाडूंना श्वासही घेण्याची संधी न देता पुन्हा फील्ड गोल नोंदवला. यामुळे मध्यंतराला भारताकडे २-० अशी आघाडी होती.

ऑस्ट्रेलियाने उत्तरार्धात अचूक आणि भेदक खेळ करताना दोन गोल केले. विलिस (३६) व मिटन (४३) यांनी गोल करत सामन्यात बरोबरी साधली. मात्र भारताने गोल करण्याचे प्रयत्न सुरू ठेवले. अखेर पेनल्टी कॉर्नरचा सदुपयोग करून रघुनाथने भारताला आघाडी मिळवून दिली. सामन्याच्या अखेरच्या सत्रात भारताने सावध खेळ करत ऑस्ट्रेलियाला गोल करण्याची संधी दिली नाही.

मालिकेतील दुसरा सामना बुधवारी रंगणार आहे.