हंगेरीची जलतरणपटू कॅटिन्काची कमाल
वृत्तसंस्था, ग्लासगो
'पोलादी स्त्री' म्हणून ओळखली जाणारी हंगेरीची कॅटिन्का होसझु हिने वयाच्या तिसाव्या वर्षी कमाल करून दाखविली आहे. तिने युरोपियन शॉर्ट कोर्स अजिंक्यपद जलतरण स्पर्धेच्या निमित्ताने आपल्या ६०व्या आंतरराष्ट्रीय सुवर्णपदकाची नोंद केली. या सुवर्णपदकासह तिची आंतरराष्ट्रीय पदकांची संख्या ९० झाली आहे.
कॅटिन्काने ४०० मी. मिडलेत ही सुवर्णविजेती कामगिरी केली. १५ वर्षांपूर्वी तिने याच स्पर्धेत २००४मध्ये आपले पहिले पदक जिंकले होते. होसझुने ४ मिनिटे २५.१० सेकंद अशी वेळ दिली. तिच्या खात्यातील ६० सुवर्णपदकांत ३ ऑलिम्पिक सुवर्ण, २६ जागतिक सुवर्ण आणि ३१ युरोपियन सुवर्णपदकांचा समावेश आहे. आता ती २०२०च्या टोकियो ऑलिम्पिकमध्ये सहभागी होणार आहे.
टोकियोसाठी ती कोणत्याही प्रशिक्षकाशिवाय सराव करणार असून तिथे एकटीनेच ती सहभागी होईल. ती म्हणते की, मी दीर्घ काळापासून जलतरणासंदर्भात स्वतःच सगळे नियोजन करते आहे. कशाप्रकारच्या तयारीची मला आवश्यकता आहे हे मला ठाऊक आहे. दर दिवशी मी ८ ते १० तास सराव करते. अगदी गलितगात्र होईपर्यंत.