ऐझॉल पहिल्या आयलीग विजेतेपदाकडे

ऐझॉल : मिझोराममधील ऐझॉल फुटबॉल क्लबने आय लीग फुटबॉल स्पर्धेच्या पहिल्या विजेतेपदाच्या दिशेने कूच केले आहे. भारतीय फुटबॉलमधील दिग्गज संघ म्हणून ओळखल्या जाणाऱ्या मोहन बगानवर त्यांनी १-० अशी मात करत विजेतेपदाच्या दिशेने भक्कम पाऊल टाकले. १७ सामन्यांतून त्यांचे ३६ गुण झाले असून मोहन बगानपेक्षा त्यांच्या खात्यात ३ जादा गुण आहेत. आता त्यांना अखेरच्या साखळी सामन्यात शिलाँग लाजोंगविरुद्ध केवळ बरोबरीची गरज आहे. ३० एप्रिलला हा सामना होईल.

मोहन बगानने आयलीगचे दोन हंगामांपूर्वी विजेतेपद पटकाविले होते. त्यांनाही विजेतेपदाची यंदा संधी आहे, पण त्यांनी ३० एप्रिलला होत असलेल्या लढतीत चेन्नई सिटी फुटबॉल क्लबवर मात करणे अपेक्षित आहे. त्याचवेळी ऐझॉल संघाला शिलाँगकडून पराभव स्वीकारावा लागला तर बगानचे विजेतेपद निश्चित होईल.

बगानविरुद्धच्या सामन्यात ऐझॉलच्या झोहमिंगलिआना राल्टेने ८३व्या मिनिटाला महत्त्वपूर्ण गोल करून ऐतिहासिक विजयाची नोंद केली. खालिद जमील यांच्या मार्गदर्शनाखाली खेळणाऱ्या ऐझॉल संघाने गेल्या वर्षी आयलीगमध्ये प्रवेश केला आणि आठव्या स्थानावर त्यांना समाधान मानावे लागले. त्यामुळे आयलीगचे विजेतेपद जिंकण्यात जर त्यांना यश आले तर ईशान्य भारतातून आयलीग जिंकणारा पहिला संघ ठरण्याचा मान त्यांना मिळेल.