महिला एकेरी क्रमवारीत अग्रस्थानी असणारी अमेरिकेची टेनिसपटू सेरेना विल्यम्स सोमवारपासून अमेरिकन ओपन ग्रँड स्लॅम स्पर्धेतील आपल्या वाटचालीस सुरुवात करणार आहे. उजव्या खांद्याच्या दुखापतीतून सावरत असलेल्या सेरेनावर कामगिरीत सातत्य ठेवण्याबरोबरच विक्रमी २३वे ग्रँड स्लॅम विजेतेपद मिळवण्याबाबत तिच्याकडून असलेल्या अपेक्षांच्या ओझ्याचाही सामना करावा लागणार आहे. सेरेनाने या वर्षी विम्बल्डन स्पर्धा जिंकून बाविसावे ग्रँड स्लॅम विजेतेपद पटकावले. याबरोबरच तिने स्टेफी ग्राफच्या ओपन एरामधील सर्वाधिक २२ ग्रँड स्लॅम विजेतेपदांच्या विक्रमाशी बरोबरी केली. आता तिला अमेरिकन ओपन स्पर्धा जिंकून स्टेफी ग्राफला मागे टाकण्याची संधी आहे. त्याचप्रमाणे, ऑस्ट्रेलियाच्या मार्गारेट कोर्ट यांच्या सर्वकालिक सर्वाधिक विजेतेपदांच्या विक्रमाच्या दिशेनेही ती एक पाऊल पुढे टाकेल. मार्गारेट कोर्ट यांनी एकूण २४ ग्रँड स्लॅम विजेतीपदे पटकावली आहेत. इतरही काही विक्रमांना सेरेना गवसणी घालू शकते. ग्राफच्या सर्वाधिक १८६ आठवडे जागतिक क्रमवारीत अग्रस्थानी राहण्याचा विक्रम सेरेना मागे टाकू शकते. तसेच अमेरिकन ओपन स्पर्धा सर्वाधिकवेळा जिंकण्याच्या विक्रमातही ती ख्रिस एव्हर्ट यांच्यापुढे जाऊ शकते. सध्या सेरेना आणि एव्हर्ट या दोघींच्या नावावर प्रत्येकी सहा अमेरिकन ओपन विजेतीपदे जमा आहेत. तथापि, हे आव्हान वाटते तितके सोपे नाही. नुकत्याच झालेल्या रिओ ऑलिंपिकमध्ये सेरेनाला तिसऱ्या फेरीत एलिना स्विटोलिनाकडून पराभूत व्हावे लागले होते. त्याचप्रमाणे खांद्याच्या दुखापतीमुळे माँटरिअल डब्ल्यूटीए स्पर्धेतून माघार घ्यावी लागली होती. सध्यातरी या सर्वांचा विचार करत नसून प्रत्येक सामन्याचा विचार करत असल्याचे सेरेना सांगते.
इतिहास रचण्याचे सेरेनासमोर आव्हान
महिला एकेरी क्रमवारीत अग्रस्थानी असणारी अमेरिकेची टेनिसपटू सेरेना विल्यम्स सोमवारपासून अमेरिकन ओपन ग्रँड स्लॅम स्पर्धेतील आपल्या वाटचालीस सुरुवात करणार आहे.
Maharashtra Times 29 Aug 2016, 4:30 am