जागतिक बॉक्सिंग: अमीत, मनीष उपांत्यपूर्व फेरीत

एकतरिनबर्ग (रशिया): एशियन चॅम्पियन अमित पंघल (५२ किलो), मनीष कौशिक (६३ किलो) आणि संजीत यांनी (९१ किलो) आपापल्या प्रतिस्पर्ध्यांना पराभूत करून जागतिक बॉक्सिंग स्पर्धेच्या उपांत्यपूर्व फेरीत प्रवेश केला. अमितला जागतिक स्पर्धेतील दुसरे पदक मिळविण्याची संधी आहे. मनीष आणि संजीतची ही पदार्पणाची स्पर्धा आहे. हे तिन्ही बॉक्सर सैन्यदलातील आहेत.

एशियाड सुवर्णपदक विजेत्या अमितने तुर्कीच्या बातुहान सितफसीवर ५-०ने मात केली. पहिल्या फेरीत 'राइट हुक'चा जबरदस्त वापर करून अमितने आघाडी मिळवली. बातुहानने त्याला प्रत्युत्तर देण्याचा प्रयत्न केला खरा; पण त्यात त्याला यश आले नाही. यानंतर अमितने त्याला शेवटपर्यंत संधी दिली नाही. अमितची पुढील फेरीत फिलिपिन्सच्या कार्लो पालमविरुद्ध लढत होईल. गेल्या वर्षी जकार्ता येथे झालेल्या एशियाड गेम्सच्या उपांत्य फेरीत अमितने त्याला पराभूत केले आहे. अमित म्हणाली, 'एका अनुभवी बॉक्सरविरुद्ध मी चांगली लढत दिली. उद्याच्या लढतीत पालमविरुद्ध माझ्या योजना तयार आहेत. हा विजय मी भारताचे पंतप्रधान नरेंद्र मोदी यांना समर्पित करतो. त्यांचा आज वाढदिवस आहे.'

पुरुषांच्या ६३ किलो गटात कौशिकने चौथ्या मानांकित मंगोलियाच्या चिंगझोरिग बातारसुखला ५-० असा पराभवाचा धक्का दिला. चिंगझोरिगने एशियाडमध्ये रौप्यपदक मिळवले आहे. त्याचबरोबर आशियाई अजिंक्यपद स्पर्धेत त्याने दोन वेळा पदक पटकावले आहे. कौशिकची आता ब्राझीलच्या वँडरसन डी ओलिव्हेराविरुद्ध लढत होईल. यानंतर ९१ किलो गटात संजीतने दुसऱ्या मानांकित उझबेकिस्तान संजार तुरसुनोववर ३-२ने सनसनाटी विजय मिळवला. संजारने मागील जागतिक स्पर्धेत ब्राँझपदक मिळवले आहे. त्याचबरोबर तो एशियाड रौप्यपदक विजेता बॉक्सर होता. संजीतची उपांत्यपूर्व फेरीत सातव्या मानांकित इक्वेडोरच्या ज्युलिओ सेसा कॅस्टिलो टोरसविरुद्ध लढत होईल.