अँकरिंगमधला ‘सच्चिन’

Vinayak.rane@timesgroup.com

कॅप्टन कूल असो वा तरुणांची मनाची धडकन आलिया भट, त्यांच्याशी त्यांच्या क्षेत्राविषयी बोलत बोलत, आपल्याला हवं ते काढून घेणं सचिनला खूप छान जमतं. होय, हा सचिन सध्या टीव्हीवर प्रो कबड्डीच्या मॅटवरुन आपल्या घरात एंट्री घेतो. हिंदी-इंग्लिश-मराठीवरील प्रभुत्व आणि हजरजबाबीपणामुळे प्रेक्षकांचा तो आवडता अँकर बनलाय.

ट्रेंडी हेअरकट, फंकी कपडे यांना खेळांच्या चांगल्या अभ्यासाची साथ दिल्याने सचिन कुंभार क्रीडासूत्रसंचालनात आघाडीवर आहे. दादरचा रानडे रोड आणि छबिलदास गल्लीत वाढलेल्या या तरुणाचा कबड्डी लीगपर्यंतचा प्रवास आडवळणानेच झाला. दादरचीच आइस शाळा, रुईया कॉलेज पुढे विवेकानंदमधून केलेले केटरिंग आणि मग दुबईत आवाजाच्या दुनियेतील आठ वर्षे असा पल्ला गाठत सचिन प्रो कबड्डीत आला. कबड्डीआधी त्याने हॉकी लीगमध्ये अँकरिंग केलं. दुबईत असताना या मराठी मुलानं पाकिस्तानी चॅनलसाठीही काम केलंय असं कळतं तेव्हा आश्चर्याचा धक्का बसतो. मायभूमीच्या ओढीनं एका रात्रीत तो भारतात परतला. अँकरिंगमध्येच सचिनने नव्याने सुरुवात करायला घेत ‘बॉम्बे टाइम्स फ्रेशर्स फिनाले’मध्ये अँकरिंग केलं. फेमिना मिस इंडियाशी सचिन जोडला गेला. स्पर्धकांच्या मनातून स्टेजची भीती काढून टाकण्याचं महत्वाचं काम तो करतो. कसं बोलावं, आत्मविश्वासाने कसं वावरावं हे सचिन शिकवतोय. रुईयाच्या क्वाड्रायंगलमध्ये शेवटी उभा राहणारा सचिन आज मात्र थेट मिस इंडिया स्पर्धेतील स्पर्धकांना आत्मविश्वासाचे धडे देतोय. ‘आता मनात कोणताही न्यूनगंड नाही. मी बँकिंग आणि इक्विटी अशा पुरस्कार सोहळ्यांचंही सूत्रसंचालन करतो’, असं सचिन सांगतो.

शूटच्या आदल्या दिवशी आम्हाला खेळाडू, संघांची माहिती पुरवली जाते. त्यातून हवी असलेली माहिती स्क्रिप्टमध्ये पेरून तुमच्यापुढे सादर करतो. अनुपकुमार, राहुल चौधरी अशा कबड्डीपटूंशी बोलताना विविधता राखण्याचं भान बाळगावे लागतं. खरं तर खेळांचं ज्ञान नसल्याने सुरूवातीला हे काम नाकारलं होतं; पण शिकण्याची तयारी दाखवली आणि पुढील गोष्टी सोप्या झाल्या.

- सचिन कुंभार