वासेकचा मरेला धक्का

फॅबिओकडून त्सोंगालाही पराभवाचा धक्का

इंडियन वेल्स : पात्रता फेरीतून आगेकूच करणाऱ्या वासेक पॉस्पिसिलने इंडियन वेल्स टेनिस स्पर्धेत सनसनाटी विजयाची नोंद केली. वासेकने अव्वल मानांकित अँडी मरेला ६-४, ७-६ (५) असा पराभवाचा धक्का दिला आणि तिसरी फेरी गाठली.

जागतिक क्रमवारीत कॅनडाचा वासेक १२९व्या, तर ब्रिटनचा मरे अव्वल स्थानावर आहे. यापूर्वी हे दोघे चार वेळा आमनेसामने आले होते. त्यात चारही वेळा मरेनेच बाजी मारली होती. साहजिकच लौकिक पाहता मरेचेच पारडे जड मानले जात होते. मरेने सुरुवातही चांगली केली होती. सुरुवातीला त्याने वासेकची सर्व्हिस भेदली होती. त्या जोरावर सहाव्या गेमअखेर मरेने ४-२ अशी आघाडी घेतली होती. मात्र, शेवटच्या क्षणापर्यंत झुंजण्याचे इराद्याने कोर्टवर उतरलेल्या वासेकने सलग सहा गेम जिंकून पहिल्या सेटमध्ये बाजी मारली. आव्हान राखण्यासाठी मरेला दुसरा सेट जिंकणे गरजेचे होते. या सेटमध्ये प्रत्येक गुणासाठी चुरस पाहायला मिळाली. अखेरीस हा सेट टायब्रेकमध्ये गेला. त्यात वासेकने जोरदार सुरुवात केली. त्याने ६-२ अशा आघाडीसह चार मॅच पॉइंट मिळविले होते. त्यानंतर मरेने चिवट झुंज देत तीन पॉइंट वाचविले. त्यानंतर झालेल्या एका जबरदस्त रॅलीत फोरहँडचा सुरेख फटका मारत वासेकने विजयावर शिक्कामोर्तब केले. अन्य लढतींत स्वित्झर्लंडच्या स्टॅन वाव्रिंकाने इटलीच्या लोरेंझी पावलोवर ६-३, ६-४ अशी मात केली. तसेच, इटलीच्या फॅबिओ फॉग्निनीने फ्रान्सच्या जो-विल्फ्रेड त्सोंगाला ७-६ (४), ३-६, ६-४ असा पराभवाचा धक्का दिला. क्रमवारीत त्सोंगा आठव्या, तर फॅबिओ ४३व्या क्रमांकावर आहे. यापूर्वी हे दोघे चार वेळा आमनेसामने आले होते. त्यात चारही वेळा त्सोंगाने बाजी मारली होती. या वेळीही त्सोंगाचे पारडे जड मानले जात होते. मात्र, या वेळी फॅबिओने बाजी मारली.