ज्युनियर अॅथलेटिक्समध्ये भारताला आणखी तीन पदके
वृत्तसंस्था, जिफू (जपान)
पुरुषांच्या ८०० मीटर शर्यतीत भारताच्या अनु कुमारने सुवर्ण तर महिलांच्या थाळीफेक प्रकारात अर्पणदीप कौर बाजवाने ब्राँझ पदक जिंकून ज्युनियर आशियाई अॅथलेटिक्स अजिंक्यपद स्पर्धेत भारताच्या खात्यात आणखी तीन पदकांची भर घातली. या स्पर्धेचा एक दिवस शिल्लक असताना भारताने तीन सुवर्णपदके, एक रौप्य आणि ९ ब्राँझपदके जिंकलेली आहेत.
उत्तराखंडच्या अनुने भारताला स्पर्धेतील तिसरे सुवर्ण जिंकून दिले. त्याने ८०० मीटर शर्यतीत १ मिनिट ५४.११ सेकंद अशी वेळ दिली. जागतिक शालेय क्रीडा स्पर्धेत अनुने रौप्य जिंकून दिले होते. ४ बाय १०० मीटर रिलेत भारताने ब्राँझपदक जिंकले. त्यानंतर अर्पणदीप कौरच्या रूपात भारताला दिवसातले तिसरे पदक मिळाले. अर्पणने ४६.५७ मीटर थाळीफेक करून ब्राँझपदकाची कमाई केली.
इतर खेळाडूंकडून मात्र निराशा पदरी पडली. दुर्गा देवरेने १५०० मीटरमध्ये ब्राँझ जिंकले होते पण महिलांच्या ८०० मीटरमध्ये तिला पाचव्या स्थानावर समाधान मानावे लागले. लांब उडीत दीपांशी सिंग सातव्या स्थानावर फेकली गेली.