वृत्तसंस्था, नवी दिल्ली
स्पर्धेनिमित्त वर्षांतील सुमारे २०० दिवस प्रवास करणारी भारताची आघाडीची स्क्वॉशपटू सध्या इतरांप्रमाणेच 'लॉकडाउन'मुळे घरात आहे. विशेष म्हणजे, घरात सध्या आपण एकटेच असल्याने जवळच्या दुकानातून सामान आणणे, हा सुद्धा आपल्यासाठी नवा अनुभव ठरत असल्याचे जोश्नाने सांगितले.
जोश्नाची आई चेन्नईमध्ये अन्यत्र राहात असून, वडील सध्या कूर्गमध्ये आहेत. त्यामुळे, घरातील लहानसहान गोष्टी करण्यापासून ते स्वतःच्या अस्वस्थतेवर उपाय शोधण्यापर्यंत सर्व आघाड्यांवर जोश्ना तोंड देते आहे. सुमारे साडेतीन आठवडे मी घरात आहे. सुरुवातीच्या काही दिवसांपर्यंत घरात विश्रांती घ्यायला मिळत असल्याची भावना दिलासादायक होती. मात्र, सुमारे दोन आठवड्यानंतर हा एकांतवास अंगावर येऊ लागला, असे जोश्नाने संगितले. या काळात मानसिकदृष्ट्या कणखर राहाणेही महत्त्वाचे असून, या पूर्वी कधीही न केलेल्या गोष्टी शिकण्यासाठीही ही चांगली संधी असल्याचे जोश्ना सांगते. 'सध्या जवळच्या दुकानात जाणे ही सुद्धा मोठी कामगिरी बनली आहे. जवळपास सर्वजण सारख्याच परिस्थितीतून जात आहेत. सुदैवाने आपण आपल्या घरांमध्ये सुरक्षित आहोत. देशामध्ये अनेकांना आपले घर गाठण्यासाठीही मैलोन्मैल पायपीट करावी लागते आहे,' असेही जोश्नाने नमूद केले.
करोना विषाणू संसर्गामुळे व्यावसायिक स्क्वॉश महासंघाने (पीएसए) जुलैपर्यंतच्या सर्व स्पर्धा रद्द केल्या आहेत. या काळात स्वतःचे शारीरिक, तसेच मानसिक आरोग्य सांभाळणे हे सर्वांत मोठे आव्हान असल्याचे जोश्ना सांगते. दीर्घकाळ घरी राहिल्यामुळे खेळाडू म्हणून स्वतःला लावून घेतलेली शिस्त कमी होऊ शकते. तुमचे आहार संतुलन, झोपेची, सरावाची वेळ आदी गोष्टींवरही आणि त्याचा परिणाम होतो. त्यामुळे एकप्रकारची शारीरिक व मानसिक शिथिलता येत असून, कोणत्याही खेळाडूसाठी ती चांगली नाही, असे जोश्ना म्हणाली.
सध्याच्या काळामध्ये खेळाला काहीच महत्त्व उरले नसले, तरी हा काळ निघून जाईल आणि आपण पुन्हा नव्या जोमाने स्क्वॉश कोर्टवर उतरू, असा विश्वासही ३३ वर्षीय जोश्नाने व्यक्त केला.