अर्चना कामतने ब्राँझही गमावले

ब्युनोस आयर्स : पहिल्या तीन दिवस सुवर्णयश मिळवणाऱ्या भारताला गुरुवारी युवा ऑलिम्पिक स्पर्धेत पदक मिळवण्यात अपयश आले. टेबल टेनिसमध्ये अर्चना कामत ब्राँझपदकाच्या लढतीत पराभूत झाली, तर मुलींच्या हॉकी संघाला यजमान अर्जेंटिनाकडून पराभव पत्करावा लागला.

अर्चना ही युवा ऑलिम्पिक स्पर्धेच्या उपांत्य फेरीत दाखल होणारी पहिली भारतीय खेळाडू ठरली होती. मात्र, उपांत्य फेरीत पराभव पत्करावा लागल्याने तिला ब्राँझपदकासाठीच्या लढतीत खेळावे लागले. या लढतीत तिला रोमानियाच्या आंद्रीया द्रेगोमनकडून ११-८, ११-१३, ९-११, ५-११, ९-११ असा पराभव पत्करावा लागला. यानंतर हॉकीत अर्जेंटिनाने भारतावर ५-२ने विजय मिळवला. सलग तीन विजयानंतर भारतीय मुलींना पराभवाला सामोरे जावे लागले. अर्जेंटिनाकडून सेलिना डी सँटोने सातव्या मिनिटाला गोल केला. दोन मिनिटानंतर मुमताझ खानने गोल करून भारताला बरोबरी साधून दिली. दहाव्या मिनिटाला सोफिया रामाल्लोने गोल करून अर्जेंटिनाला पुन्हा आघाडी मिळवून दिली. मध्यंतराला काही सेकंदांचा अवधी शिल्लक असताना रीतने गोल करून भारताला बरोबरी साधून दिली. यानंतर सोफिया (१२ मि.), जोसेफिना (१७ मि.) आणि गिअॅनेल्ला(१९ मि.) यांनी गोल करून अर्जेंटिनाला ५-२ असा विजय मिळवून दिला. भारताची आता दक्षिण आफ्रिकेविरुद्ध लढत होईल. तत्पूर्वी, मुलांच्या संघालाही ऑस्ट्रेलियाकडून ४-३ने पराभव पत्करावा लागला. जलतरणमध्ये अद्वैत पागे हिटमध्ये सातव्या स्थानी राहिला. भारताने आतापर्यंत या स्पर्धेत तीन सुवर्ण, तीन रौप्यपदके मिळवली आहेत.