नोटाबंदीमुळे स्पर्धा रद्द

Roushan.Jha@timesgroup.com

नवी दिल्लीः पुणे मॅरेथॉनला नोटाबंदीचा फटका बसल्यानंतर आता देशातील इतर खेळांनाही नोटाबंदीचा मोठ्या प्रमाणाच फटका बसू लागला आहे. २६ ते ३० डिसेंबर दरम्यान चेन्नईमध्ये आयोजित करण्यात येणारी राष्ट्रीय सीनियर अजिंक्यपद तर १५ ते २१ डिसेंबर दरम्यान विजयवाडा येथे रंगणारी ज्युनियर तिरंदाजी अजिंक्यपद स्पर्धा नोटाबंदीमुळे सध्यातरी स्थगित करण्यात आली आहे.

आयोजकांची माघार

भारतीय तिरंदाजी असोसिएशनचे खजिनदार वीरेंद्र सचदेवा यांच्या मते, २६ ते ३० डिसेंबर दरम्यान रंगणाऱ्या राष्ट्रीय सीनियर अजिंक्यपद स्पर्धेसाठी ऑगस्टमध्येच तामिळनाडू सरकारशी बोलणी झाली होती. तेव्हा या अजिंक्यपद स्पर्धेसाठी आम्हाला अनुदान देण्याचे आश्वासनही दिले होते. मात्र त्यानंतर मुख्यमंत्री जयललिता यांना हॉस्पिटलमध्ये दाखल करावे लागल्याने बोलणी पुढे सरकली नाही. त्यानंतर जयललिता यांचे निधन झाले. या दरम्यान प्रायोजकांशीदेखील बोलणे झाले होते अन् अनेक गोष्टींना अंतिम स्वरुप देणेच बाकी होते. मात्र याला ‘खो’ घातला तो नोटाबंदीच्या निर्णयाने. या निर्णयामुळे प्रायोजकांनी अखेरच्या क्षणी माघार घेतली. या सगळ्या गोष्टींमुळे भारतीय तिरंदाजी असोसिएशनने सध्या तरी या दोन्ही स्पर्धा स्थगित करण्याचा निर्णय घेतला आहे.

आशिया कपही संकटात

भारताला मोठ्या कालावधीनंतर आंतरराष्ट्रीय तिरंदाजी स्पर्धेचे यजमानपद भूषवण्याची संधी मिळाली आहे. ३१ जानेवारी ते ६ फेब्रुवारी दरम्यान आशिया कपचे आयोजन भारतात होते आहे; पण नोटाबंदीमुळे भारतीय तिरंदाजी असोसिएशनला या स्पर्धेचे आयोजनही मोठ्या दिव्याप्रमाणे वाटू लागले आहे. दरम्यान २२ डिसेंबरला भारतीय तिरंदाजी असोसिएशनने बैठक बोलावली असून नोटाबंदी असतानाही आशिया कपचे आयोजन विनाअडथळा कसे करण्यात येईल यावर मार्ग काढण्यात येणार असल्याचे खजिनदार सचदेवा यांनी नमूद केले.

टाटा स्टीलच्या रुपाने तिरंदाजीकडे एक खमका अन् हक्काचा प्रायोजक आहे. मात्र काही कारणास्तव टाटाने प्रायोजक्तव देण्यास असमर्थ असल्याचे सांगितले. त्यानंतर आमच्याकडे कोणताच प्रायोजक नाही. आम्ही प्रयत्न सोडले नसून विविध व्यावसायिक कंपन्यांशी संपर्क साधून प्रायोजकत्वासाठी विचारणा करत आहोत. आशा आहे की यावर काहीतरी मार्ग निघेल अन् स्पर्धेचे यशस्वी आयोजन होईल.

वीरेंद्र सचदेवा (खजिनदार, भारतीय तिरंदाजी असोसिएशन)