तिंरदाजीत भारताला तीन सुवर्ण

बँकॉक : प्रोमिला दायमरीने गुरुवारी दुसऱ्या वैयक्तिक सुवर्णपदकाची कमाई केल्याने भारताच्या ज्युनियर तिरंदाजांची आशिया कप तिरंदाजी स्पर्धेतील पदकांची कमाई तीन सुवर्ण, दोन ब्राँझ अशी झाली.

स्पर्धेच्या अखेरच्या दिवशी आकाश, गोरा हो आणि गौरव लाम्बे या भारताच्या त्रिकूटाने मंगोलियाच्या बासानखू, बातारखुयाग, गंतग जांटसॅन या त्रयीचे आव्हान टायब्रेकमध्ये २७-२६ असे परतवून लावत सुवर्णपदक मिळवले. त्याआधी प्रोमिला दायमरीने रशियाच्या नतालिया एर्डिनिएव्हावर ७-३ अशी सहज मात करून महिलांच्या वैयक्तिक रिकर्व्हमध्ये सुवर्णपदकाची कमाई केली. याच गटात भारताच्या मधू वेदवानला ब्राँझपदकावर समाधान मानावे लागले. मधू वेदवानने मंगोलियाच्या अलटॅनगेरलवर ६-५ अशी मात केली. दोघींमध्ये ५-५ अशी बरोबरी झाल्याने शूटऑफचा अवलंब करण्यात आला त्यात मधूने ९-८ अशी सरशी साधली. महिलांच्या वैयक्तिक कंपाउंडमध्ये मुस्कान किरारने मलेशियाच्या नाधिरा झकारिया सझातुलवर १३९-१३६ असा विजय मिळवून सुवर्णपदक खिशात टाकले. मुस्कानने स्पर्धेतील आपले दुसरे पदक पटकावले ते ब्राँझच्या रुपात. मुस्कान, दिव्या धयाल आणि मृणाल हिवराळे यांच्या संघाने श्रीरांती, दीली, निना बोनिता यांच्या संघाला २२७-२२१ असे नमवत ब्राँझपदक निश्चित केले.