प्रियांकावर आठ वर्षांची बंदी

बेंगळुरू : एशियाड सुवर्णपदक जिंकणारी धावपटू प्रियांका पन्वरवर डोपिंगमध्ये दोषी आढळल्याप्रकरणी राष्ट्रीय उत्तेजक द्रव सेवन विरोधी संस्थेने (नाडा) आठ वर्षांची बंदी घातली आहे. डोपिंगमध्ये ती दुसऱ्यांदा दोषी आढळली आहे. यामुळे २९ वर्षाच्या प्रियांकाची कारकीर्द जवळपास संपुष्टात आली आहे.

गेल्या वर्षी आंतरराज्य अॅथलेटिक्स स्पर्धेदरम्यान खेळाडूंची ‘डोपिंग टेस्ट’ घेण्यात आली होती. त्यात तिने बंदी घातलेल्या ‘मेफेन्टेरमाइन’चे सेवन केल्याचे समोर आले आहे. तिच्यावरील बंदी जुलै २०१६ पासून गृहीत धरली जाणार आहे. २०११मध्ये प्रियांकासह पाच अॅथलिटना डोपिंगमध्ये दोषी आढळल्याप्रकरणी दोन वर्षांसाठी निलंबित करण्यात आले होते. दुसऱ्यांदा दोषी आढळल्यामुळे नियमानुसार प्रियांकावर ८ वर्षांची बंदी घालण्यात आली. प्रियांकाने २०१४च्या एशियन गेम्समध्ये ४ बाय ४०० मीटर रिलेत सुवर्णपदक जिंकले आहे. यात तिच्यासह टिंटू लुका, मनदीप कौर, एम. आर. पूवम्माचाही समावेश आहे. थाळीफेकपटू अर्जुन हादेखील ‘अ’ चाचणीत दोषी आढळला आहे. मात्र, त्याचा निर्णय नंतर दिला जाणार आहे.