म. टा. प्रतिनिधी, औरंगाबाद
डोंबिवली येथे झालेल्या १५व्या राज्यस्तरीय टंबलिंग व ट्रॅम्पोलिन जिम्नॅस्टिक्स स्पर्धेत औरंगाबादच्या वरिष्ठ संघाने विजेतेपद पटाकावले. तसेच चौदा वर्षांखालील मुला-मुलींच्या संघाने सांघिक तृतीय स्थान मिळवले.
या स्पर्धेत औरंगाबाद संघातील खेळाडूंनी लक्षवेधक कामगिरी नोंदवली. शौर्य शर्मा व अजय पहुरकरने सुवर्णपदक पटाकावले. तसेच या खेळाडूंनी वैयक्तिक दोन सुवर्ण व एक रौप्यपदकाची कमाई देखिल केली. चौदा वर्षांखालील मुला-मुलींच्या गटात औरंगाबादचा संघ सांघिक तृतीय स्थानावर राहिला. वरिष्ठ गटात औरंगाबाद संघाने वर्चस्व राखत जेतेपद संपादन केले. या खेळाडूंना शिवछत्रपती क्रीडा पुरस्कार प्राप्त डॉ. रणजित पवार यांचे मार्गदर्शन लाभले आहे. या कामगिरीबद्दल क्रीडा उपसंचालक ऊर्मिला मोराळे, जिल्हा क्रीडा अधिकारी अशोक गिरी, राज्य जिम्नॅस्टिक्स संघटनेचे सचिव डॉ. मकरंद जोशी, जिल्हा संघटनेचे कार्याध्यक्ष अॅड. संकर्षण जोशी, अध्यक्ष डॉ. आदित्य जोशी, सचिव हर्षल मोगरे, तनुजा गाढवे, विशाल देशपांडे, सागर कुलकर्णी, राहुल तांदळे, अमेय जोशी, रोहित रोंघे यांनी खेळाडूंचे अभिनंदन केले. संघा समवेत प्रशिक्षक म्हणून संतोष साबळे हे गेले होते.