म. टा. प्रतिनिधी, पुणे
वैभव आगमच्या अर्धशतकाच्या जोरावर यजमान महाराष्ट्राने पश्चिम विभाग क्रिकेट स्पर्धेत पाहुण्या बडोदा संघासमोर २४६ धावांचे लक्ष्य ठेवले.
येवलेवाडीमध्ये ही लढत सुरू आहे. महाराष्ट्राने पहिल्या डावात १८६ धावांपर्यंत मजल मारली. प्रत्युत्तर देताना बडोद्याचा डाव सुदर्शन कुंभारच्या अचूक गोलंदाजीसमोर १२२ धावांत आटोपला. महाराष्ट्राला ६४ धावांची महत्त्वपूर्ण आघाडी मिळाली. त्यानंतर महाराष्ट्राने दुसऱ्या डावात १८१ धावांपर्यंत मजल मारली. त्यात वैभव आगमने ८२ चेंडूंत ७ चौकारांसह ५३ धावांची खेळी केली. वैभवने पहिल्या डावातही अर्धशतक (७३ धावा) झळकावले होते.
बडोद्यासमोर २४६ धावांचे लक्ष्य असून, बडोद्याने दिवसअखेर खातेही उघडले नव्हते. ओम भाबडने करण रावलला पायचीत करून बडोद्याला पहिला धक्का दिला.
डेक्कन जिमखाना क्लबच्या ग्राउंडवर सुरू असलेल्या लढतीत प्रणय थापा आणि मनीष यादव यांच्या अर्धशतकांच्या जोरावर सौराष्ट्राने मुंबईविरुद्ध दिवसअखेर ३ बाद १५९ धावांपर्यंत मजल मारली. प्रणयने १७३ चेंडूंत ११ चौकारांसह ५६ धावांची, तर मनीषने १७१ चेंडूंत १४ चौकारांसह ८७ धावांची खेळी केली.
संक्षिप्त धावफलक : १. महाराष्ट्र : पहिला डाव - ६२.१ षटकांत सर्वबाद १८६ (वैभव आगम ७३, अर्चित गायकवाड ३८, अभिषेक स्वामिनाथन ६-४०, वेदान्त भट ४-६२) आणि दुसरा डाव - ४८.५ षटकांत सर्वबाद १८१ (वैभव आगम ५३, सुदर्शन कुंभार २९, वंश पटेल ५-३५, वेदान्त भट ४-६८) वि. बडोदा : पहिला डाव - ६२.२ षटकांत सर्वबाद १२२ (क्रिश पटेल ३२, तिर्थ बक्षी २१, सुदर्शन कुंभार ५-३७, ओम भाबड २-१४, आयुष राकताडे २-१४) आणि दुसरा डाव - २ षटकांत १ बाद ०.
२. सौराष्ट्र : पहिला डाव - सर्वबाद १३३ (कार्तिक भडाना ६०, ऋषीकेश गोरे ४-३२, आर्यन शेजुळे २-३२) आणि दुसरा डाव - ६७ षटकांत ३ बाद १५९ (मनीष यादव ८७, प्रणय थापा ५६) वि. मुंबई : पहिला डाव - सर्वबाद १२६ (प्रतीक यादव २७, आयुष म्हात्रे २४, मयूर्य घोघरी ६-२५).
-------------