जागतिक तिरंदाजी संघटनेचा निर्णय
वृत्तसंस्था, कोलकाता
भारतीय तिरंदाजी फेडरेशनने आपल्या निवडणुका घेतल्यानंतर जागतिक तिरंदाजी संघटनेने या संघटनेवरील बंदी उठविली आहे. जागतिक तिरंदाजी संघटनेने आपल्या पत्रात म्हटले आहे की, भारतीय तिरंदाजी फेडरेशनने जागतिक फेडरेशनच्या नियम व घटनेच्या अधीन राहात उत्तम कारभार व स्पर्धांचे आयोजन यांची अंमलबजावणी करावी. दर तीन महिन्यात आपला अहवाल जागतिक संघटनेकडे सादर करावा.
आशियाई अजिंक्यपद तिरंदाजी स्पर्धेत भारताच्या तिरंदाजांना भारताच्या ध्वजाखाली खेळणे शक्य होणार नव्हते पण ही बंदी उठविल्यामुळे आता ते भारताचे प्रतिनिधित्व करू शकणार आहेत. पुढील तीन आठवड्यात लास वेगास येथे इनडोअर वर्ल्ड सीरिज ही तिरंदाजी स्पर्धाही होणार आहे. त्यासाठी भारतीय तिरंदाजांना तिरंग्याखाली खेळण्याची संधी मिळू शकेल.
शनिवारी केंद्रीय मंत्री अर्जुन मुंडा यांची तिरंदाजी संघटनेच्या अध्यक्षपदी निवड झाली. तीन निरीक्षकांच्या उपस्थितीत ही प्रक्रिया पार पडली. त्यात एक निरीक्षक जागतिक तिरंदाजी संघटनेकडून आला होता. मुंडा यांनी बीव्हीपी राव यांना ३४-१८ या फरकाने पराभूत केले.
दिल्ली उच्च न्यायालयाच्या आदेशानुसार या निवडणुका झाल्या. दोन कट्टर प्रतिस्पर्धी एकमेकांसमोर उभे ठाकले होते.