मध्यंतरी बेटिंगला कायदेशीर मान्यता द्या, असे वृत्त प्रसिद्ध झाले. यानिमित्ताने मान्यता द्यावी की नको, यावर चर्चा सुरू झाली आहे. बेटिंग अधिकृत करणे योग्य आहे असे काहींचे म्हणणे आहे, तर यासंदर्भात खूप काळजीपूर्वक पावले टाकावीत, असेही काहींना वाटते.
बेटिंगला विरोध
बेटिंगला मान्यता देण्यास माझा विरोध आहे. तसे झाल्यास बेटिंग करणाऱ्यांना क्रिकेटपटूंच्या जवळ जाण्याची संधी मिळेल. कायदेशीर मान्यताच मिळाल्यास कुणावर अंकुश ठेवणे कठीण जाईल. सभ्य गृहस्थांचा क्रिकेटसारखा खेळ त्यामुळे बदनाम होईल.
- दीपक म्हापसेकर
द्विधा मनःस्थिती
बेटिंगच्या बाबत द्विधा मनःस्थिती आहे. त्याला मान्यता मिळाली तर सरकारला महसूल मिळेल हे मान्य पण त्या खेळाबद्दल प्रत्येकजण कदाचित बेटिंगच्या नजरेतूनच पाहील की, काय अशी भीतीही वाटते. त्यातून मूळ खेळच बाजूला पडणार नाही ना?
- प्रसाद फाटक
मान्यता देणे योग्य
माझ्या मते बेटिंगला अधिकृत करणे योग्य. परदेशात त्याला कायदेशीर मान्यता आहे. त्यावर बंदी घातल्यास त्यातून आणखी समस्या निर्माण होतील. पण खेळाडूच त्यात गुंतून पडणार नाहीत ना, याचाही विचार व्हावा. त्यांच्यावर अंकुश ठेवणे गरजेजे आहे.
- माणिक मडकईकर
बेटिंगबंदीच योग्य
बेटिंगवर खरे तर भारतात बंदीच असली पाहिजे. आधीच इंडियन प्रीमियर लीगमुळे क्रिकेटमध्ये प्रचंड पैसा आला आहे. प्रत्येक खेळाडूला आज आयपीएल खेळावीशी वाटते आणि त्यातून पैसा कमवावासा वाटतो. कसोटी क्रिकेट व खेळाचा दर्जा संपत चालला आहे.
- सतीश चाफेकर
भारतात ही संकल्पना नको
खेळात बेटिंग आपल्याकडे कदापिही मान्य होण्यासारखे नाही. त्यामुळे खेळातील आत्माच नष्ट होईल. भारतात भलेही क्रीडा सुविधांचा अभाव असेल, नियोजनात कमी पडत असू तरीही बेटिंग ही आपली संस्कृती नाही. आपल्याकडे ही संकल्पना नसायला हवी.
- सुवर्णा देवळाणकर