मुंबई : बिपिन फुटबॉल अकादमीची ३३वी फुटबॉल स्पर्धा २८ आणि २९ डिसेंबर रोजी चर्चगेट येथील कर्नाटक स्पोर्टिंग असोसिएशनच्या मैदानावर आयोजित करण्यात आली आहे. अकादमीच्या शिबिरात सहभागी झालेल्या आठ केंद्रांमध्ये होणारी ही स्पर्धा साखळी आणि बाद पद्धतीने खेळविली जाते. या स्पर्धेत चर्चगेट, बीएमसी कॅम्प (कफ परेड), कुलाबा, अंधेरी-विलेपार्ले, दहिसर, मिरा रोड, वसई, उल्हासनगर या केंद्रांचे संघ खेळणार आहेत. या स्पर्धेचे उद्घाटन २८ डिसेंबरला सकाळी ७.३० वाजता होणार असून २९ डिसेंबरला दुपारी ३.३० वाजता स्पर्धेचा समारोप होईल.
करंदीकरचे ६ बळी; मिश्राचे शतक
मुंबई : डावखुरा फिरकी गोलंदाज ओमकार करंदीकरचे ६ बळी आणि सुमित मिश्राचा शतकी तडका हे संतोषकुमार घोष ट्रॉफी या १६ वर्षाखालील मुलांच्या क्रिकेट स्पर्धेच्या उपांत्य फेरीतील लढतींचे वैशिष्ठ्य ठरले. करंदीकरने ९० धावांत ६ बळी मिळविल्याने शिवाजी पार्क जिमखाना संघाने मुंबई पोलिसांना २४५ धावांत रोखले आणि पहिल्या दिवसअखेर बिनबाद १९ धावा केल्या आहेत. दुसऱ्या उपांत्य लढतीत एव्हरग्रीन सी.सी. संघाने युनायटेड सी.सी. विरुद्ध प्रथम फलंदाजी करताना ८ बाद २६१ धावा केल्या आहेत. सुमित मिश्राच्या (१०१) शतकी खेळीमुळे त्यांना ही मजल मारता आली. स्कोअरबोर्ड : मुंबई पोलीस जिमखाना सर्वबाद २४५ (आतिफ खान ६८, खुश जैन ५१; ओमकार करंदीकर ९० धावांत ६ बळी, अथर्व भगत ३९/२) वि. शिवाजीपार्क जिमखाना बिनबाद १९. एव्हरग्रीन सी.सी. ८ बाद २६१ (सुमीत मिश्रा १०१, यश सबनानी ३७, पूजन राऊत ३८, वैष्णव नखाते खेळत आहे ३३; भारत दोराई राजन ३८/३, अक्षय तळेकर ५१/२, अंशुमन सुरेश ८६/२).
बँक ऑफ बडोदा, सेंट्रल बँक, उपांत्य फेरीत
मुंबई : बँक ऑफ बडोदा, सेंट्रल बँक, बँक ऑफ इंडिया यांनी मुंबई शहर कबड्डी असो.ने आयोजित केलेल्या आणि मुंबई शारीरिक शिक्षण मंडळाने पुरस्कृत केलेल्या जिल्हा अजिंक्यपद निवड चाचणी कबड्डी स्पर्धेच्या पुरुष विशेष व्यावसायिक गटाच्या उपांत्य फेरीत धडक दिली. तर महिलांच्या व्यसवसायिक गटात साई सिक्युरिटी, मध्य रेल्वे-मुंबई विभाग, जे. जे. रुग्णालय यांनी उपांत्य फेरी गाठली. भारतीय क्रीडा मंदिराच्या क्रीडांगणावर सुरू असलेल्या पुरुष विशेष व्यावसायिक गटाच्या उपांत्यपूर्व फेरीच्या सामन्यात बँक ऑफ बडोदाने न्यू इंडिया इन्शुरन्सचा ३३-२८ असा पराभव करीत उपांत्य फेरीत प्रवेश केला. नितीन देशमुख, जितेश पाटील यांच्या चढाई-पकडीच्या आक्रमक सुरुवातीने बँकेने विजयाच्या दिशेने कूच केली होती. न्यू इंडियाच्या सुहास गौंडा, सागर सुर्वे, जितेश पवार यांनी बँकेला विजयासाठी चांगलेच झुंजविले. सेंट्रल बँकेने मध्य रेल्वे विभागाचा कडवा प्रतिकार शेवटी २०-१९ असा मोडीत काढत उपांत्य फेरी गाठली. रोहित पाटील, विनायक मोरे यांनी उत्तरार्धात केलेल्या धुव्वादार चढाई-पकडीच्या खेळाला या विजयाचे श्रेय जाते. बँक ऑफ इंडियाने बृहन्मुंबई मुंबई महानगर पालिकेच्या आव्हान ३१-२९ असे परतवून लावत या गटात आपली विजयी घोडदौड सुरूच ठवली. अक्षय सोनी, दीपक शिंदे यांच्या चतुरस्त्र खेळाच्या जोरावर बँकेने विजयाचा पाया रचला. महिला व्यावसायिक गटाच्या उपांत्यपूर्व सामन्यात साई सिक्युरिटीने इनफिल्ड टाऊनचा ४४-१८ असा लीलया पराभव केला