मुंबई : विलेपार्ले मुंबई पब्लिक स्कुल संघाने डी वाय पाटील इंटरनॅशनल स्कूल संघावर मुलांच्या १८ वर्षांखालील बास्केटबॉल स्पर्धेत २०-१६ असा पराभव करत बायजूस पुरस्कृत स्पोर्ट्स फॉर ऑल स्पर्धेत चमक दाखवली. कलिना येथील मुंबई विद्यापीठ संकुलात पार पडलेल्या या स्पर्धेत विलेपार्ले मुंबई पब्लिक स्कुलचा स्टार खेळाडु अनंत खाडापकरने सात गुणांची कमाई करत निर्णायक भूमिका पार पाडली. तर, डी वाय पाटीलला रौप्यपदकावर समाधान मानावे लागले. गुरुकुल एज्युकेशनल इन्स्टिट्यूशनला ब्राँझपदक मिळाले. मुलांच्या १४ वर्षांखालील गटातील हॉकीच्या अंतिम सामन्यात डॉन बॉस्को इंटरनॅशनल संघाने सेंट झेवियर्स हायस्कूल संघावर विजय मिळवला. मुलांच्या १६ वर्षांखालील गटाच्या अंतिम सामन्यात डॉन बॉस्को संघाला चिल्ड्रेन अॅकॅडमी संघाकडून ०-५ असे पराभूत व्हावे लागले. १४ वर्षांखालील गटातील हँडबॉलच्या अंतिम सामन्यात आयईएस सेकंडरी स्कूल संघाने डॉन बॉस्को इंटरनॅशनल संघाला १२-७ असे नमवित सुवर्णपदक मिळवले. डॉन बॉस्को इंटरनॅशनल स्कुल (माटुंगा) संघ १७६ गुणांसह सर्वसाधारण अजिंक्यपदासाठी आघाडीवर आहे.
पार्ले टिळकची अंजुमनवर मात
मुंबई : १६ वर्षांखालील मुलांच्या हॅरिस शिल्ड क्रिकेट स्पर्धेच्या सुपर लीगच्या दुसऱ्या फेरीत पार्ले टिळक विद्यालयाने अंजुमन इस्लाम अलाना संघावर पहिल्या डावातील ६२ धावांच्या आघाडीच्या जोरावर विजय मिळविला. आर्य गवसने घेतलेल्या ४ बळींमुळे पार्ले टिळकने अंजुमनला १३३ धावांवर उखडले. अ गटात अल बरकतने अँटोनिओ डासिल्व्हा शाळेला पहिल्या डावातील आघाडीवर पराभूत केले. याच गटातील दुसऱ्या सामन्यात व्हीके कृष्ण मेनन संघाने चिल्ड्रेन्स एड सोसायटी संघावर एक डाव आणि २६९ धावांनी दणदणीत मात केली. ब गटात डॉन बॉस्कोने बॉम्बे स्कॉटिशला फॉलोऑन देत पहिल्या डावाच्या आघाडीवर विजय मिळविला. त्यात पहिल्या डावातील साहिल जाधवच्या ११६ धावांचा मोठा वाटा होता.
स्कोअरबोर्ड : अ गट : अल बरकत ३०२-२ डाव घोषित पहिल्या डावातील आघाडीच्या जोरावर विजयी वि. अँटोनिओ डासिल्व्हा १८९.
व्हीके कृष्ण मेनन अकादमी ५-४४९ डाव घोषित विजयी वि. चिल्ड्रेन्स एड सोसायटी १०७ आणि फॉलोऑननंतर ७३ (एक डाव आणि २६९ धावांनी विजयी)
ब गट : डॉन बॉस्को ६-३११ पहिल्या डावातील आघाडीवर विजयी वि. बॉम्बे स्कॉटिश १३१ (अनुज गिरी ४९, आयुष सावंत ३-२०) आणि फॉलोऑननंतर ३-११५ (आदित्य गिरी ना. ५२).
पार्ले टिळक विद्यालय १९५ (इमाद जिन्दानी ३९-६) आणि ५ बाद ९७ विजयी वि. अंजुमन इस्लाम अलाना १३३ (आर्य गवस ४-३१)