वृत्तसंस्था, नवी दिल्ली
दोन वर्षांपूर्वीच तिने बंदूक हातात घेतली... तेदेखील ती खेळत असलेल्या मार्शल आर्ट्समध्ये तिला दुखापत झाल्याने... सहज हातात म्हणून घेतलेल्या बंदुकीतून तिने झाडलेल्या गोळ्यांनी अचूक लक्षवेध घेतला... त्यानंतर तिने मागे वळून पाहिलेच नाही... एक दिवस आंतरराष्ट्रीय स्पर्धेत आपण सुवर्णयश मिळवणार, हा विश्वास तिला होता... पण पहिल्याच वर्ल्ड कपमध्ये... आणि त्यातही सलग दोन दिवसांत दोन सुवर्णपदक.... १६ वर्षांच्या मनू भाकेरला आपल्या कामगिरीवर अजूनही विश्वास बसत नाही.
मेक्सिकोत सुरू असलेल्या स्पर्धेत तिसऱ्या दिवशी सुवर्णपदक जिंकल्यानंतर मनू म्हणाली, 'वरिष्ठ गटाच्या वर्ल्ड कप स्पर्धेत मी दोन सुवर्णपदके जिंकू शकेन, यावर माझा विश्वासच नाही. १० मीटर एअर पिस्तूलच्या वैयक्तिक प्रकारात मी थोडी नर्व्हस होती. यात १७व्या शॉट्सला मला ८.४, तर १९व्या शॉट्सला ८.१ गुणच मिळवता आले. यानंतर मात्र मी मागे वळून पाहिले नाही.' ती आता सिडनीत होणाऱ्या ज्युनियर वर्ल्ड कप स्पर्धेत सहभागी होणार आहे. त्यानंतर पुढील महिन्यात गोल्ड कोस्ट राष्ट्रकुल स्पर्धेत आपले कौशल्य दाखवेन. मनू म्हणाली, 'पहिल्याच मोठ्या स्पर्धेत माझ्या योजना यशस्वी ठरल्या. आता आगामी स्पर्धेत या कामगिरीत सातत्य राखण्याचा माझा प्रयत्न असेल. सर्वोत्तम कामगिरी करून देशासाठी पदक मिळवण्याचेच माझे लक्ष्य आहे.' तिरुअनंतपूरम येथे गेल्या वर्षी झालेल्या राष्ट्रीय नेमबाजी स्पर्धेत तिने १० मीटर एअर पिस्तूलमधील हीना सिद्धूचा जुना विक्रम मोडला.