विजयवाडा : महाराष्ट्राच्या चैत्राली गुजर, सृष्टी शेट्टी यांनी ३३व्या राष्ट्रीय ज्युनिअर अॅथलेटिक्स स्पर्धेत आपापल्या गटातून ‘वेगवान धावपटू’चा मान मिळवला.
स्पर्धेतील २० वर्षांखालील मुलींच्या १०० मीटर धावण्याच्या शर्यतीत साताऱ्याच्या चैत्रालीने १२.१३ सेकंद वेळ नोंदवून सुवर्णपदक मिळवले. ही तिची सर्वोत्तम वेळ ठरली. स्पर्धेतील १४ वर्षांखालील मुलींच्या गटात महाराष्ट्राच्या सृष्टीने १०० मीटर धावण्याची शर्यत १२.७४ सेकंदांत पूर्ण करून सुवर्णयश मिळवले. स्पर्धेतील १४ वर्षांखालील मुलींच्या उंच उडीत महाराष्ट्राच्या श्रावणी देसावळेने (१.५४ मी.) सुवर्णपदकाची कमाई केली.
यानंतर १६ वर्षांखालील मुलांच्या गटातील १०० मीटर धावण्याच्या शर्यतीत करण हेगिस्तेला (११.११ से.) ब्राँझपदकावर समाधान मानावे लागले. स्पर्धेतील १८ वर्षांखालील मुलींच्या हातोडाफेकमध्ये महाराष्ट्राच्या स्नेहा जाधवने रौप्यपदक मिळवले. तिने ५१.६९ मीटर अशी कामगिरी नोंदवली. हरियाणाच्या पूनम जाखरने ५८.२३ मीटर या कामगिरीसह नवा विक्रम रचून सुवर्णपदक पटकावले. यानंतर १४ वर्षांखालील मुलींच्या लांब उडीत महाराष्ट्राच्या काजल माजीने ४.८३ मीटर अशी कामगिरी नोंदवून रौप्यपदक मिळवले. यानंतर १८ वर्षांखालील मुलींच्या गोळा फेकमध्ये पूर्णा रावराणे हिने (१४.३९ मी.) रौप्यपदकाची कमाई केली.