अमलराज अँथनी
अल्टीमेट टेबल टेनिस स्पर्धेच्या उपांत्य फेरीत धडक मारल्याचा आनंद काही वेगळाच आहे. विशेष म्हणजे गोवा चॅलेंजर्स संघाचा हा पदार्पणाचा हंगाम असतानाही ही कामगिरी करता आली याचे कौतुक वाटते. यू मुम्बा, दबंग दिल्ली आणि चेन्नई लायन्स या संघांनीही उपांत्य फेरीत प्रवेश केला आहे. या प्रत्येक संघाने दमदार कामगिरी केली आहे. आता साखळीत झालेल्या सामन्यांतील निकालांना तसा अर्थ नाही. उपांत्य फेरीत प्रवेश केलेल्या प्रत्येक संघाला आता नव्याने सुरुवात करावी लागेल. कारण हे सगळेच संघ सारख्या दमाचे आहेत. त्यामुळे कुणाला संभाव्य विजेता म्हणता येणार नाही. यापैकी जो संघ सर्वोत्तम कामगिरी करेल तो ११ ऑगस्टला होत असलेल्या अंतिम फेरीत धडक मारेल. आम्हीही चमकदार कामगिरी केली तर अंतिम फेरीत पोहोचणे कठीण जाणार नाही.
यू मुम्बाविरुद्ध आम्हाला ४-११ असा पराभव पत्करावा लागला होता. मात्र त्याचे कारण म्हणजे जागतिक क्रमवारीत ११व्या स्थानी असलेला चेंग चिंग हिची आम्हाला जाणवलेली अनुपस्थिती. मात्र ती परतल्यावर आम्हाला त्याचा फायदा झाला. त्यामुळे पुणेरी पलटणविरुद्ध आम्ही ११-४ या फरकाने विजय मिळविला.
यूटीटी ही लीग भारतीय टेबलटेनिसचा चेहरामोहरा बदलणार हे मी सुरुवातीपासूनच सांगत होतो. या लीगमुळे नवोदितांना एक व्यासपीठ उपलब्ध झाले आहे.
बीव्हीके स्पोर्टस अँड मीडिया
लेखर गोवा चॅलेंजर्स संघाचा कर्णधार आहे.