म. टा. प्रतिनिधी, लातूर
लातूर तालुक्यातील भुसणी येथील कुस्तीपटू चंद्रशेखर पाटीलने पुण्याच्या कुमार शेलारला पराभूत करुन मानाची सिद्धेश्वर केसरीची गदा पटाकावली. मुन्तजीर सरनौबत व सुंदर जवळगे यांनी चांदीचे कडे पटाकावले.
सिद्धेश्वर यात्रेतील मानाची सिद्धेश्वर केसरीची गदा कोण पटाकावते याविषयी कुतुहल निर्माण झाले होते. चंद्रशेखर पाटील व कुमार शेलार यांच्यात अंतिम झुंज झाली. अटीतटीच्या झुंजीत चंद्रशेखरने कुमारला चितपट करुन मानाची कुस्ती जिंकली. सिद्धेश्वर देवस्थानाच्यावतीने कै. विलासराव देशमुख यांच्या स्मरणार्थ दिलदी जाणारी मानाची सिद्धेश्वर केसरीची गदा चंद्रशेखरला प्रदान करण्यात आली.
उमरगा तालुक्यातील कसगी येथील कुस्तीपटू मुन्तजीर सरनौबतने महापालिकेतर्फे दिले जाणारे ५१ तोळ्याचे चांदीचे कडे पटाकावले. ज्युनिअर गटातून सरनौबत विजेता ठरला होता. सबज्युनिअर गटात तुळजापूर तालुक्यातील खुदावाडी येथील सुंदर जवळगेने विजेतेपद संपादन केले. त्याला सुधाकरराव कोकाटे यांच्या स्मरणार्थ दिले जाणारे २१ तोळ्यांचे चांदीचे कडे प्रदान करण्यात आले. या स्पर्धेत पंच म्हणून अशोक भोसले व शिवाजी काळे यांनी काम पाहिले.
पारितोषिक वितरण सोहळ्यास धर्मादाय उपायुक्त यु. एस. पाटील, पोलिस अधिक्षक राजेंद्र माने, विक्रम गोजमगुंडे, अशोक भोसले, नरेश पंड्या, अप्पासाहेब घुगरे, विशाल झांबरे, अमर कोकाटे, व्यंकटेश हालिंगे यांची प्रमुख उपस्थिती होती.