म. टा. प्रतिनिधी, औरंगाबाद
परभणी येथे झालेल्या विभागीय शालेय टेबल टेनिस स्पर्धेत परभणीच्या बाल विद्यामंदिर संघाने १७ व १९ वर्षांखालील गटात जेतेपद पटाकावत दुहेरी मुकुट मिळवला.
या स्पर्धेत १४, १७, १९ वर्षांखालील गटात १८ संघांनी सहभाग नोंदवला. यात १४ वर्षांखालील मुलांच्या गटात अंबाजोगाईच्या खोलेश्वर विद्यालय संघाने जेतेपद तर जालन्याच्या एमआरडी हायस्कूल संघाने उपविजेतेपद मिळवले. १७ वर्षांखालील मुलांच्या गटात परभणीच्या बाल विद्यामंदिर संघाने विजेतेपद पटाकावले. खोलेश्वर विद्यालयाचा संघ उपविजेता ठरला. १९ वर्षांखालील मुलांच्या गटात बाल विद्यामंदिर संघाने अजिंक्यपद मिळवले. औरंगाबादच्या दिल्ली पब्लिक स्कूल संघाने उपविजेतेपद संपादन केले.
परभणी येथेच राज्य शालेय टेबल टेनिस स्पर्धा होणार आहे. या स्पर्धेत औरंगाबाद विभागाचा संघ सहभागी होईल. ही स्पर्धा १२ ते १६ डिसेंबर या कालावधीत होणार आहे.
निवड समिती सदस्य म्हणून राज जैस्वाल, चेतन मुक्तावार, महेश कुलकर्णी यांनी काम पाहिले. पंच म्हणून भक्ती मुक्तावार, नरसिंह चाटे, सुरज भुजबळ, कौस्तुभ कदम, पवन कदम, गजानन समिंदरे यांनी काम पाहिले. या प्रसंगी शिवछत्रपती क्रीडा पुरस्कार प्राप्त डॉ. माधव शेजुळ, टेबल टेनिस संघटनेचे सचिव गणेश माळवे, क्रीडा अधिकारी पंडीत चव्हाण, डी. पी. पंडीत, सचिन पुरी यांची प्रमुख उपस्थिती होती. स्पर्धेच्या यशस्वीतेसाठी किशोर ढोके, प्रसेन्नजित बनसोडे, दीपक भारद्वाज आदींनी पुढाकार घेतला.