नवी दिल्ली : इंडियन प्रीमियर लीग टी-२० क्रिकेट स्पर्धेच्या विजेतेपदाचा करंडक देण्यावरून रविवारी वाद उद्भवण्याची चिन्हे होती. आयपीएल पारितोषिक वितरण सोहळ्यामध्ये बीसीसीआय प्रशासक समिती सदस्य डायना एडल्जी यांनी विजेत्या मुंबई इंडियन्स संघाला स्वहस्ते करंडक देण्याची इच्छा व्यक्त केली. तथापि, अखेर परंपरेनुसार बीसीसीआयचे प्रभारी अध्यक्ष सी. के. खन्ना यांच्या हस्ते मुंबईचा कर्णधार रोहित शर्माला हा करंडक देण्यात आला. प्रशासकीय समितीचे अध्यक्ष विनोद राय हे अंतिम लढतीत उपस्थित राहू शकले नाहीत. जयपूरमध्ये झालेल्या महिलांच्या टी-२० चॅलेंज स्पर्धेचा करंडक एडल्जी यांनीच दिला होता. आयपीएल करंडकही त्यांनाच विजेत्या संघाला द्यायचा होता.
प्लंकेट दोषमुक्त
साउदम्प्टन : इंग्लंडचा वेगवान गोलंदाज लिआम प्लंकेट याला आंतरराष्ट्रीय क्रिकेट परिषदेने (आयसीसी) चेंडूशी छेडछाड केल्याच्या आरोपांमधून दोषमुक्त केले आहे. पाकिस्तानविरुद्धच्या वन-डे क्रिकेट सामन्यात त्याने चेंडूशी छेडछाड केल्याचा आरोप होता. तथापि, पंच ख्रिस ग्रॅफनी आणि पॉल रायफल, तसेच सामनाधिकारी रिची रिचर्डसन यांनी याप्रकरणी त्याला दोषमुक्त ठरवले.
.....
निवडणूका ९ जूनला?
कोलकाता : भारतीय तिरंदाजी संघटनेच्या (एएआय) निवडणूका ९ जून रोजी होण्याची शक्यता आहे. पूर्वनियोजनानुसार या निवडणूका २६ मे रोजी घेण्यात येणार होत्या. तथापि, 'एएआय'चे प्रभारी अध्यक्ष सुनील शर्मा यांनी २६ मे च्या निवडणुकांविषयीची अधिसूचना मागे घेतल्यामुळे या निवडणूका लांबणीवर पडल्या आहेत. सुप्रीम कोर्टाने १० मे रोजी दिलेल्या निकालानुसार या निवडणूका घेण्यात येणार आहेत.
....
भारताची बरोबरी
पर्थ : ड्रॅगफ्लिकर हरमनप्रीत सिंगने केलेल्या एकमेव गोलच्या जोरावर भारतीय पुरुष हॉकी संघाने ऑस्ट्रेलिया अ संघास १-१ अशा बरोबरीत रोखले. या सामन्यात २१ व्या मिनिटास किरण अरुणासलमने केलेल्या गोलमुळे ऑस्ट्रेलिया अ संघाने आघाडी घेतली होती. ही आघाडी ऑस्ट्रेलिया अ संघाने अखेरच्या पाच मिनिटांपर्यंत टिकवून ठेवली होती. मात्र, ५६ व्या मिनिटास हरमनप्रीतने गोल करून भारताला बरोबरी साधून दिली.
........