मनिका, हरमितची 'अर्जुन'साठी शिफारस

नवी दिल्ली : टेबल टेनिस फेडरेशनने प्रतिष्ठेच्या अर्जुन पुरस्कारासाठी राष्ट्रकुल स्पर्धेत चार पदकांची घसघशीत कमाई करणारी खेळाडू मनिका बात्रा हिची शिफारस केली आहे.

टेटे फेडरेशनच्या अधिकाऱ्याने सांगितले की, गोल्ड कोस्ट येथे तिने केलेल्या दमदार कामगिरीनंतर शासनाच्या समितीला तिला दुर्लक्षित करणे कठीण आहे. आम्ही तिच्या नावाची शिफारस पाठविली आहे.

गोल्ड कोस्टमध्ये मनिकाने एकहाती खेळ करत सांघिक सुवर्ण जिंकून दिले. तिने सिंगापूरच्या फेंग या खेळाडूला पराभूत करण्याची किमया दोनवेळा केली. महिला दुहेरीचे रौप्यही तिच्यामुळे भारताला मिळाले. मौमा दाससह ती महिला दुहेरीत खेळली. त्यानंतर साथियनसह तिने मिश्र दुहेरीत ब्राँझ पटकाविले.

आता २९ एप्रिलपासून स्वीडनला होत असलेल्या जागतिक सांघिक अजिंक्यपद स्पर्धेत ती खेळणार आहे. टेटेपटू हरमित देसाई, ज्याने राष्ट्रकुल स्पर्धेत पुरुषांच्या सांघिक विजयात महत्त्वाची कामगिरी बजावली, त्याच्या नावाचीही शिफारस अर्जुन पुरस्कारासाठी करण्यात आली आहे.