दीपा करणार पुनरागमन
नवी दिल्ली : दुखापतीमुळे आशियाई क्रीडा स्पर्धेपासून खेळाला मुकलेली ऑलिम्पिक खेळाडू दीपा कर्माकर पुन्हा एकदा खेळण्यासाठी सज्ज झाली असून जर्मनीतील कोटबस येथे होणाऱ्या जिम्नॅस्टिक्स वर्ल्डकपमध्ये ती खेळणार आहे. गुरुवारपासून ही स्पर्धा सुरू होईल. भारताकडून बी. अरुणा रेड्डी, आशीष कुमार, राकेश पात्रा आणि दीपा सहभागी होत आहेत. यावर्षी जुलैमध्ये दीपाने तुर्कीतील आर्टिस्टिक्स जिम्नॅस्टिक्स वर्ल्ड चॅलेंज कप स्पर्धेत सुवर्णपदक जिंकले होते. त्यामुळे दीपाकडून बऱ्याच अपेक्षा आहेत. जकार्तातील आशियाई स्पर्धेत तिला गुडघेदुखीमुळे माघार घ्यावी लागली होती. आशीषने २०१०च्या आशियाई स्पर्धेत ब्राँझ पटकाविले होते तर राकेशने यावर्षी राष्ट्रकुल स्पर्धेत चौथ्या क्रमांकावर उडी घेतली होती. अरुणाने यावर्षीच्या वर्ल्डकपमध्ये ब्राँझपदक जिंकले होते.