जिम्नॅस्टिक्स वर्ल्डकपच्या अंतिम फेरीत धडक
वृत्तसंस्था, बाकु
भारताची आघाडीची जिम्नॅस्ट दीपा कर्माकर हिने आर्टिस्टिक्स जिम्नॅस्टिक्स वर्ल्डकपच्या पात्रता फेरीत व्हॉल्टमध्ये तिसरे स्थान मिळवून अंतिम फेरीत धडक मारली.
२५ वर्षीय दीपाने २०१६च्या रिओ ऑलिम्पिकमध्ये व्हॉल्टमध्ये चौथे स्थान मिळविल्यामुळे ती बरीच चर्चेत आली होती. अगदी थोड्या फरकाने तिचे ब्राँझपदक हुकले होते. वर्ल्डकप पात्रता फेरीत तिने उच्च काठीण्यपातळीत ही कामगिरी करून दाखविली. दीपाने दोन पात्रता फेऱ्यांमध्ये १४.४६६ आणि १४.१३३ गुणांची कमाई केली. सरासरी १४.२९९ गुण तिच्या खात्यात जमा झाल्यामुळे तिचा अंतिम फेरीचा मार्ग मोकळा झाला.
अमेरिकेच्या जेड कॅरीने पात्रता फेरीत १४.७० गुणांसह अव्वलस्थान मिळविले. मेक्सिकोच्या अॅलेक्सा मोरेनोने १४.५३३ गुणांसह दुसरे स्थान मिळविले. पात्रता फेरीतील पहिल्या आठ क्रमांकांना अंतिम फेरीत स्थान मिळते. शनिवारी अंतिम फेरीत प्रवेश केलेल्या खेळाडूंमध्ये झुंज होईल. शुक्रवारी दीपा बॅलन्स बीम प्रकारातही सहभागी होणार आहे.
गेल्या वर्षी दीपाने जर्मनीत झालेल्या आर्टिस्टिक्स जिम्नॅस्टिक्स वर्ल्डकपमध्ये ब्राँझपदक जिंकले होते. त्यानंतर गुडघेदुखीमुळे ती खेळापासून काही काळ दूर गेली होती. पण त्यातून सावरल्यानंतर तिची ही पहिलीच मोठी स्पर्धा आहे. या दुखापतीच्या काळात तिला जकार्तातील आशियाई क्रीडा स्पर्धेतील अंतिम फेरीला मुकावे लागले होते.