मुंबई : क्रीडाप्रेमींसाठी विशेष आकर्षण ठरणारा 'डेरवण यूथ गेम्स २०२०' हा क्रीडा महोत्सव यंदा ५ ते १२ मार्चदरम्यान चिपळूणनजिकच्या डेरवण येथे रंगणार आहे. गुरुवार, ५ मार्च रोजी बॅडमिंटनपटू डॉ. अतुल बिनीवाले आणि जिम्नॅस्ट मधुरा तांबे यांच्या हस्ते क्रीडा महोत्सवाचे उद्घाटन तर, समारोप अर्जुन विजेते टेबलटेनिसपटू कमलेश मेहता यांच्या उपस्थितीत होईल.
श्री विठ्ठलराव जोशी चॅरिटीज ट्रस्टच्या वतीने शिवजयंतीच्या निमित्ताने एसव्हीजेसीटी क्रीडा संकुलात या क्रीडा महोत्सवाचे आयोजन करण्यात येते. यंदा या स्पर्धेचे सहावे वर्ष आहे. अॅथलेटिक्स, नेमबाजी, बॅडमिंटन, बास्केटबॉल, कॅरम, बुद्धिबळ, फूटबॉल, जिम्नॅस्टीक्स, कबड्डी, खो-खो, लंगडी, मल्लखांब, जलतरण, टेबलटेनिस, व्हॉलीबॉल, वॉल क्लायम्बिंग, योग या खेळांच्या स्पर्धा येथे होतील. ८ ते १८ या वयोगटातील खेळाडू यात सहभागी होऊ शकतील. ३ मार्चपर्यंत इच्छुकांनी नोंदणी करावी. अधिक माहिती www.svjctsportsacademy.com या वेबसाइटवर मिळेल. संपर्क - ९८२२६३९३०६
परळमध्ये खोखो
मुंबई : लायन्स क्लब ऑफ माहीम व मुंबई खो-खो संघटना यांच्या आयोजनाखाली तसेच विद्यार्थी क्रीडा केंद्र यांच्या सहकार्याने मुंबई किशोर किशोरी जिल्हा अजिंक्यपद स्पर्धा २३ ते २६ फेब्रुवारी २०२० यादरम्यान लाल मैदान परळ येथे होणार आहे.
या स्पर्धेमध्ये विद्यार्थी, ओम समर्थ भारत, सरस्वती, युवक व श्री समर्थ व्यायाम मंदिर हे किशोर गटात तर किशोरी गटात ओम साईश्वर सेवा मंडळ, शिवनेरी, श्री समर्थ, वैभव व अमर हिंद हे संघ खेळतील.
`पीटीकेएस कनेक्ट'चे प्रकाशन
मुंबई : विलेपार्ले येथील छत्रपती शिवाजी महाराज स्मारक समिती संचालित प्रबोधनकार ठाकरे क्रीडा संकुलातील पहिल्या `पीटीकेएस कनेक्ट' मासिकाचे प्रकाशन नुकतेच पार पडले. `पीटीकेएस कनेक्ट' या पुस्तकाच्या प्रकाशन सोहळ्याला संकुलाचे अध्यक्ष अरविंद प्रभू, सचिव डॉ. मोहन राणे,कोषाध्यक्ष डॉ. पुष्पा रमेश प्रभू, लीना प्रभू, मकरंद एकरकर, मुख्य कार्याधिकारी प्रीतम केसकर उपस्थित होते. संकुलाच्या संपूर्ण उपक्रमाच्या माहितीचे संकलन लोकांपर्यंत पोचविण्याचे कार्य ह्या मासिकामार्फत करण्यात येणार आहे.
मोहसीन, अभिलाषचा विजय
मुंबई : शिवाजी पार्क जिमखान्याने आयोजित केलेल्या बाराव्या महाराष्ट्र राज्य गुणांकन रोख पारितोषिकांच्या कॅरम स्पर्धेच्या पहिल्या फेरीच्या सामन्यात तीन गेम रंगलेल्या लढतीत जळगावच्या सय्यद मोहसीनने मुंबईच्या सागर पवारचा २५-११, १५-२५, २५-१० असा फाडशा पाहत दुसरी फेरी गाठली. तर मुंबईच्या अभिलाष डोकेने संघर्षपूर्ण रोमहर्षक तीन गेम रंगलेल्या अटीतटीच्या लढतीत मुंबईचा दिलेश खेडेकरचा १०-२५, २५-१३, २५-१५ असा पराभव केला. मुंबई-उपनगरच्या मोहम्मद वाजिद अन्सारीने जितेंद्र बारियावर १-२५, २५-११, २५-१७ असा विजय मिळविला. तर पुण्याच्या रविंद्र गायकवाडने दोन मुंबई-उपनगरच्या महर्षि देसाईचा २५-१६, २५-८ असा पराभव करून कूच केले.