ऐतिहासिक! भारतीय जिम्नॅस्ट दीपा कर्माकर ऑलिम्पिकसाठी पात्र

मटा ऑनलाइन वृत्त । दिल्ली

त्रिपुराच्या दीपा कर्माकरने ऑलिम्पिक पात्रता फेरीत एकूण ५२.६९८ गुण मिळवत रिओ ऑलिम्पिक स्पर्धेत प्रवेश मिळवला आहे. विशेष बाब म्हणजे, जिम्नॅस्टिक प्रकारात ऑलिम्पिक स्पर्धेसाठी भारताकडून प्रवेश करणारी ती पहिली भारतीय ठरली आहे. दीपाच्या या कामगिरीमुळे तिच्यावर अभिनंदनाचा वर्षाव होत आहे.

२२ वर्षाच्या दीपाने अत्यंत कठीण समजल्या जाणाऱ्या प्रोड्यूनोवा वॉल्ट राऊंडमधील पहिल्या फेरीत १५.०६६ गुण मिळवले. दीपाचे गुण या फेरीत सर्व १४ खेळाडूंमध्ये सगळ्यात जास्ती ठरले. मात्र अनइवन बार्स राऊंडमध्ये दीपाला कमी म्हणजे ११.७०० गुण मिळाले. त्यामुळे तिला १४ वा क्रमांक मिळाला. त्यानंतर बीम आणि फ्लोर प्रकारात तिला १३.३६६ आणि १२.५६६ गुण मिळाले. या सर्व प्रकारातील गुण एकत्र केल्यानंतर दीपा ऑलिम्पिकसाठीपात्र ठरली.

दीपाने २०१४ मध्ये ग्लासगो झालेल्या राष्ट्रकुल क्रीडा स्पर्धेमध्ये जिम्नॅस्ट प्रकारात ब्राँझ पदक मिळवले होते. मात्र गेल्या नोव्हेंबर महिन्यात झालेल्या जागतिक जिम्नॅस्टिक्सा स्पर्धेमध्ये ती ५व्या क्रमांकावर राहिल्यामुळे ऑलिम्पिकचे तिकीट मिळवण्यात ती अपयशी ठरली होती. अखेर पात्रता फेरीत तिने चांगला प्रयत्न करत रिओ ऑलिम्पिक स्पर्धेत प्रवेश मिळवला.