मला नको, प्रशिक्षकांना पुरस्कार द्या: पंघल

नवी दिल्ली: वैयक्तिक सन्मान नाही मिळाला तरी चालेल; परंतु माझे प्रशिक्षक अनिल धनकर यांना द्रोणाचार्य पुरस्काराने सन्मानित करावे, अशी मागणी जागतिक अजिंक्यपद बॉक्सिंग स्पर्धेमध्ये रौप्यपदक जिंकणारा भारताचा बॉक्सर अमित पंघलने केली आहे.

रशियातील एकतेरिनबर्ग येथे नुकत्याच झालेल्या या स्पर्धेमध्ये पंघलने ५२ किलो गटात रौप्यपदकाची कमाई केली. यापूर्वी त्याने आशियाई स्पर्धेमध्ये सुवर्णपदकही पटकावले आहे. 'मला वैयक्तिक पुरस्कारांची फिकीर नाही. तथापि, धनकर यांचा द्रोणाचार्य पुरस्कारासाठी विचार झाल्यास मी ऋणी राहीन. त्यांनी सुरुवातीच्या वर्षांमध्ये माझी कारकीर्द घडवली. त्यांच्या मार्गदर्शनाशिवाय मी यशस्वी बॉक्सर होऊ शकलो नसतो. मी २००८ मध्ये बॉक्सिंगला सुरुवात केली. तेव्हापासून धनकर सर पाझ्या पाठिशी ठामपणे उभे आहेत. आजही मला कोणत्याही बाबतीत गरज भासल्यास धनकर सर मार्गदर्शन करतात. त्यामुळे, त्यांना पुरस्कार मिळाल्यास तो माझाही सन्मान असेल. मला त्यामुळे जास्त आनंद होईल,' असे अमितने सांगितले. ४५ वर्षीय धनकर हे कधीही कोणत्याच देशाचे राष्ट्रीय बॉक्सिंग प्रशिक्षक नव्हते. आपल्याविषयी अमितने व्यक्त केलेल्या भावनांबद्दल कृतज्ञ असल्याचे त्यांनी सांगितले. 'मी अमितला २००५ पासून ओळखतो. तो माझ्यासाठी कुटुंबातील सदस्याप्रमाणे आहे. त्याच्या कुटुंबियांशीही माझे खूप जवळचे संबंध आहेत. त्याच्या कामगिरीचा मला खूप अभिमान वाटतो,' असे धनकर म्हणाले.

अमित २०१२ मध्ये उत्तेजक द्रव्य चाचणीत दोषी आढळल्यामुळे अर्जुन पुरस्कारासाठी त्याच्याकडे दुर्लक्ष करण्यात आले होते. तथापि, त्याला हा पुरस्कार मिळेपर्यंत दरवर्षी त्याच्या नावाची शिफारस करण्याचे भारतीय बॉक्सिंग संघटनेने (बीएफआय) ठरवले आहे. याबाबत मत मांडताना, मी जोपर्यंत देशासाठी पदके जिंकतो आहे तोपर्यंत वैयक्तिक पुरस्कारांचा विचार मी करत नाही, असे अमितने नमूद केले.