मॉस्को : बीजिंगमध्ये झालेल्या २००८ मधील ऑलिम्पिक स्पर्धेत उंच उडीमध्ये ब्राँझपदक पटकावणाऱ्या अॅना चिचेरोव्हाने उत्तेजक द्रव्य सेवन चाचणीत (डोपिंग) दोषी आढळली आहे. मंगळवारी घेण्यात आलेल्या डोपिंग चाचणीमध्ये रशियाच्या ज्या १४ अॅथलिटनी बीजिंग ऑलिम्पिकमध्ये भाग घेतला होता ते दोषी आढळले आहेत. यामध्ये चिचेरोव्हा आणि इतर नऊ पदक विजेत्यांचा समावेश आहे. यामुळे या सर्व खेळाडूंच्या रिओ ऑलिम्पिकमधील सहभागावर प्रश्नचिन्ह निर्माण झाले आहे, अशी माहिती रशियाच्या ऑलिम्पिक समितीने (आरओसी) दिली आहे. ऑगस्ट महिन्यात ब्राझीलमधील रिओ येथे होणाऱ्या ऑलिम्पिक स्पर्धेत सहभागी होण्यासाठी तयारी करणाऱ्या चिचेरोव्हाला यामुळे धक्का बसला आहे. ती म्हणाली, ‘मला याचा जबरदस्त धक्का बसला आहे. हे कसे झाले असेल हे मी स्पष्ट करू शकणार नाही. मी कोणती औषधे आणि पूरक आहार घेते याबद्दल मी कायम सतर्क असते. या प्रकरणातून बाहेर पडण्याचा माझा प्रयत्न असेल.’ चिचेरोव्हाने लंडनच्या २०१२ ऑलिम्पिक स्पर्धेत उंच उडीमध्ये सुवर्णपदक पटकावले आहे. रशियाने डोपिंगमध्ये दोषी आढळलेल्या इतर खेळाडूंची नावे जाहीर केलेली नाहीत. डोपिंगच्या दुसऱ्या चाचणीचा निकाल ३१ मे किंवा एक जूनला येणार आहे, त्यात हे खेळाडू दोषी नसल्यास त्यांना दिलासा मिळू शकतो.
रशियाच्या अॅथलिटना डोपिंगचा विळखा
बीजिंगमध्ये झालेल्या २००८ मधील ऑलिम्पिक स्पर्धेत उंच उडीमध्ये ब्राँझपदक पटकावणाऱ्या अॅना चिचेरोव्हाने उत्तेजक द्रव्य सेवन चाचणीत (डोपिंग) दोषी आढळली आहे.
Maharashtra Times 26 May 2016, 4:00 am