नवी दिल्ली : भारताच्या ज्युनियर बॉक्सरनी एशियन स्कूलबॉय बॉक्सिंग अजिंक्यपद स्पर्धेत दोन सुवर्णसह आठ पदकांची कमाई केली. कुवेतमध्ये झालेल्या या स्पर्धेत भारतीय संघ दुसऱ्या स्थानी राहिला. दोन सुवर्णपदकांसह भारतीय बॉक्सरने पाच रौप्य आणि एक ब्राँझपदकाची कमाई केली. या स्पर्धेत २२ देशांच्या बॉक्सरनी सहभाग नोंदविला होता. भारताकडून यशवर्धनसिंग (५८ किलो) आणि भरत जून (७० किलो) यांनी सुवर्णयश मिळवले. आर्यन (३७ किलो), विनय विश्वकर्मा (४९ किलो), प्रीत मलिक (५५ किलो), गौरव सैनी (६४ किलो) आणि रणदीप (७० किलोवरील) यांना अंतिम फेरीत पराभव पत्करावा लागल्याने रौप्यपदकावर समाधान मानावे लागले. नक्ष बेनिवालने (६७ किलो) ब्राँझपदक मिळवले.
आर्चरचा समावेश
लंडन : इंग्लंडने अॅशेस मालिकेतील दुसऱ्या कसोटी क्रिकेट सामन्यात मोइन अलीला विश्रांती दिली असून, त्याच्याजागी फिरकी गोलंदाज जॅक लीचचा समावेश करण्यात आला आहे. त्याचबरोबर ऑस्ट्रेलियाविरुद्ध १४ ऑगस्टपासून सुरू होणाऱ्या या कसोटीत जोफ्रा आर्चरला पदार्पणाची संधी मिळणार आहे. पहिल्या कसोटीत इंग्लंडला २५१ धावांनी पराभव पत्करावा लागला आहे. संघ : रॉरी बर्न्स, जेसन रॉय, जो रूट, जो डेन्ली, जोस बटलर, जॉनी बेअरस्टो, बेन स्टोक्स, ख्रिस वोक्स, जोफ्रा आर्चर, स्टुअर्ट ब्रॉड, जॅक लीच, सॅम करन.