उपांत्य झुंजीचे ठिकाण बदलले

नवी दिल्लीः फिफाच्या १७ वर्षांखालील वर्ल्डकपची उपांत्य झुंज आता गुवाहाटीऐवजी कोलकात्याला होणार आहे. नॉर्थ-इस्टमध्ये सध्या पावसाचा जोर असल्याने उपांत्य झुंजीचे आयोजन होत असलेल्या इंदिरा गांधी स्टेडियमच्या मैदानाच्या आऊटफील्डचे नुकसान झाले. त्यामुळे ही झुंज आता २५ तारखेलाच; पण कोलकात्यातील सॉल्टलेक स्टेडियमवर होईल.

‘आम्ही गुवाहाटी स्टेडियमच्या आऊटफील्डची पाहणी करून हा निर्णय घेतला. इथे गेले काही दिवस सातत्याने पाऊस पडतो आहे. त्यामुळे अखेर आम्ही उपांत्य सामना सॉल्टलेकच्या विवेकानंद युवा भारती क्रीडांगण येथे हलवण्याचा निर्णय घेतला’, असे फिफाच्या पत्रकात नमूद करण्यात आले आहे.

या बदलामुळे इंग्लंड आणि ब्राझिलला मात्र पुन्हा प्रवास करावा लागणार आहे. कारण हे संघ गुवाहाटीमध्ये दाखल झाले होते. तसेच सोमवारी त्यांचा सरावदेखील रंगणार होता.