क्रीडामंत्री तावडेंचे आश्वासन
म. टा. विशेष प्रतिनिधी, मुंबई
राही सरनोबत, दीपिका जोसेफ, पूजा घाटकर या शासनसेवेत असलेल्या खेळाडूंना पगारापासून वंचित राहावे लागत असल्याचे वृत्त 'मटा'ने प्रसिद्ध केले होते. त्याची दखल घेत क्रीडामंत्री विनोद तावडे यांनी या प्रकरणात लक्ष घालून खेळाडूंच्या कामाचे नियोजन, त्यांना देण्यात येणाऱ्या सवलती हे निश्चित करण्यासाठी तज्ज्ञांची एक समिती स्थापन करणार असल्याचे सांगितले. क्रीडापटूंनी क्रीडाखात्यात नोकरी करावी, असे आवाहनही त्यांनी यावेळी केले.
शिवछत्रपती राज्य क्रीडा पुरस्कारांची घोषणा क्रीडामंत्र्यांच्या उपस्थितीत झाली. त्यावेळी त्यांनी सांगितले की, राहीसारखे खेळाडू हे महाराष्ट्राचाच नव्हे तर भारताचा अभिमान आहेत. त्यांच्या समस्या आम्ही नक्कीच सोडवू. या खेळाडूंना खेळत असताना किंवा खेळत नसताना कशा सुट्ट्या असतील, त्यांच्या कामाचे स्वरूप कसे असेल हे ठरविण्यासाठी तज्ज्ञांची समिती स्थापन केली जाईल. या समितीच्या अहवालानंतर आम्ही योग्य निर्णय घेऊ.
क्रीडापटूंनी क्रीडाखात्यात नोकरी करण्याची मानसिकता ठेवावी असेही ते म्हणाले. तिथे खेळाडूंना सराव, स्पर्धांसाठी आणखी मोकळीक मिळेल, असेही त्यांनी सांगितले.