म. टा. प्रतिनिधी, औरंगाबाद
लॉकडाऊन परिस्थितीमुळे क्रीडा गुण सवलत मिळवण्यासाठीचे प्रस्ताव सादर करण्याची मुदत २० मेपर्यंत वाढवण्यात यावी अशी सूचना क्रीडा आयुक्त ओम प्रकाश बकोरिया यांनी राज्यातील सर्व विभागीय शिक्षण मंडळांना केली आहे.
दहावी आणि बारावीतील खेळाडू विद्यार्थ्यांना क्रीडा सवलतीचे वाढीव गुण देण्याबाबत शासनाने निर्णय घेतला आहे. त्यानूसार क्रीडा गुण सवलत मिळण्याकरिता विहीत नमुन्यातील प्रस्ताव संबंधित शाळांमार्फत जिल्हा क्रीडा अधिकारी कार्यालयांकडे सादर केले जातात. त्यानंतर संबंधित जिल्हा क्रीडा अधिकारी प्राप्त प्रस्तावांची छाननी करुन शिफारसीसह विभागीय शिक्षण मंडळास सादर करतात.
क्रीडा सवलतीचे वाढीव गुण मिळण्याकरिता सुधारित नियमावली निश्चित करण्यात आली आहे. संबंधित खेळाडू विद्यार्थ्यांना क्रीडा सवलत मिळण्यासाठीचे प्रस्ताव एक जानेवारी ते पाच एप्रिलपर्यंत जिल्हा क्रीडा अधिकारी कार्यालयांकडे सादर करण्याची तरतूद केली आहे. त्यानंतर संबंधित प्रस्तावांची छाननी करुन पात्र प्रस्ताव शिफारशींसह विभागीय शिक्षण मंडळास ३० एप्रिलपर्यंत सादर करण्याची तरतूद करण्यात आली आहे.
करोना विषाणू संसर्गामुळे सध्या देशभर लॉकडाऊनची परिस्थिती आहे. या कालावधीत अनेक खेळाडूंचे प्रस्ताव संबंधित जिल्हा क्रीडा अधिकारी कार्यालयांकडे सादर करणे शक्य झालेले नाही ही वस्तुस्थिती आहे. तसेच एकविध क्रीडा संघटनांतर्फे आयोजित विविध क्रीडा स्पर्धांमधील सहभागी खेळाडूंना क्रीडा गुणांची सवलत मिळण्याकरिता संबंधित क्रीडा संघटनांकडून क्रीडा व युवक सेवा संचालनालया तसेच संबंधित जिल्हा क्रीडा अधिकारी यांच्याकडे आवश्यक कागदपत्रे सादर करण्यात येत असल्यामुळे अनेक राज्य संघटना तसेच जिल्हा संघटनांना आवश्यक कागदपत्रे सादर करता आलेली नाहीत. यामुळे अनेक पात्र खेळाडू क्रीडा गुण सवलतीपासून वंचित राहण्याची शक्यता निर्माण झाली आहे.
खेळाडू विद्यार्थ्यांना क्रीडा गुण सवलत मिळण्यासाठीचे प्रस्ताव सादर करण्याची मुदत वाढवण्याबाबतचे प्रस्ताव क्रीडा संचालनालयाकडे प्राप्त झाले आहेत. पात्र खेळाडू क्रीडा गुण सवलतीपासून वंचित राहू नयेत यासाठी मुदतवाढ मिळणे गरजेचे आहे. केंद्र शासनाने तीन मेपर्यंत लॉकडाऊन जाहीर केलेला आहे. जिल्हा क्रीडा अधिकाऱ्यांनी प्राप्त झालेल्या प्रस्तावांची छाननी करुन प्राप्त प्रस्ताव शिफारशींसह विभागीय शिक्षण मंडळाकडे सादर करण्यासाठी २० मेपर्यंत मुदतवाढ देण्यात यावी अशी सूचना क्रीडा आयुक्त ओम प्रकाश बकोरिया यांनी एका लेखी पत्राद्वारे केली आहे.