वर्ल्डकपमध्ये महिला रेफ्री

नवी दिल्लीः भारतात रंगणाऱ्या १७ वर्षांखालील फिफा वर्ल्डकपमध्ये महिला पंच प्रथमच पुरुषांच्या झुंजीत सहाय्यक पंचाची भूमिका साकारताना दिसतील. फिफाने आपल्या पत्रकात म्हटले आहे की, ‘फिफाने सात सहाय्यक रेफ्रींची निवड केली; पण यात विशेष म्हणजे फिफाकडून प्रथमच पुरुषांच्या सामन्यांत महिला पंच एखादी भूमिका बजावणार आहेत. पुढे असेही सामने येतील जेव्हा पुरुषांच्या सामन्यात मुख्य पंचाची भूमिकाही महिला पंच पार पाडतील. खरेतर पडद्यामागे पुरुष पंचांसह महिलांनी सहाय्यक पंचांची भूमिका गेल्यावर्षीपासून बजावायला घेतली आहे. आता आम्हाला त्यांना मुख्य प्रवाहात आणायचे आहे. त्यासाठी हे पहिले पाऊल’, असे फिफाचे पंचप्रमुख मसिमो बसाका यांनी नमूद केले.

-भारताला अशीही संधी

दरम्यान या निमित्ताने भारताच्या १६ अधिकाऱ्यांना (आठ पंच आणि आठ सहाय्यक पंच) या स्पर्धेच्या निमित्ताने फिफाच्या अधिकाऱ्यांसह वर्ल्डकप ट्रेनिंगची संधी मिळणार आहे. ‘प्रथमच फिफाने यजमान देशाच्या अधिकाऱ्यांना अशा पद्धतीने समाविष्ट करून घेतले आहे’, असे अ. भा. फुटबॉल फेडरेशनमधील पंचांचे संचालक गौतम कार यांनी सांगितले. या ट्रेनिंगला कोलकात्यातील साईमध्ये शनिवारपासून सुरुवात झाली आहे. हा कार्यक्रम पाच ऑक्टोबरपर्यंत चालेल.