पदकांसाठी तंदुरुस्त राहणे आवश्यक

वृत्तसंस्था, नवी दिल्ली

या वर्षी अनेक सकारात्मक गोष्टी घडल्या आहेत. पण पुढील वर्षी अनेक महत्त्वाच्या स्पर्धा आहेत. त्यामुळे या स्पर्धांसाठी तंदुरुस्त राहणे माझ्यासाठी आवश्यक आहे, अशी भावना भारताचा आघाडीचा बॅडमिंटनपटू किदाम्बी श्रीकांतने व्यक्त केली आहे. आंध्र प्रदेश सरकारतर्फे आयोजित कार्यक्रमात सत्कार स्वीकारल्यानंतर श्रीकांतने आपले मत व्यक्त केले. पी. व्ही. सिंधूलाही या कार्यक्रमात गौरविण्यात आले.

श्रीकांत म्हणतो की, मी तंदुरुस्त राहिलो तर १०० टक्के कामगिरी करू शकतो. तसे झाले तर महत्त्वाच्या स्पर्धांत भारतासाठी पदके जिंकणे मला शक्य होईल.

पुढील वर्षी आशियाई क्रीडा स्पर्धा, राष्ट्रकुल क्रीडा स्पर्धा आणि जागतिक अजिंक्यपद स्पर्धा होत आहेत. या स्पर्धांचे आव्हान सर्वच स्पर्धकांपुढे असेल.

श्रीकांतने आंध्र प्रदेश सरकार आणि चाहत्यांचे आभार मानले. त्याच्या चाहत्यांमध्ये विद्यार्थी, पालक, बॅडमिंटन चाहते, अधिकारी यांचा भरणा होता. या सर्वांनी सिंधू आणि श्रीकांतभोवती घोळका करून त्यांच्यावर अभिनंदनाचा वर्षाव केला. या दोघांसमवेत छायाचित्रेही काढण्यासाठी चाहत्यांमध्ये चढाओढ लागली होती. सिंधू आणि श्रीकांतनेही कोणतेही आढेवेढे न घेता सर्वांचे समाधान केले.