रिओ ऑलिंपिकचा सदिच्छादूत होणार सचिन?

मटा ऑनलाइन वृत्त । नवी दिल्ली

रिओ ऑलिम्पिकसाठी भारतीय पथकाचा सदिच्छादूत (गुडविल अॅम्बेसेडर) म्हणून बॉलिवूड अभिनेता सलमान खानची नियुक्ती वादात सापडली असतानाच, भारतीय ऑलिम्पिक समितीनं क्रिकेटमधील विश्वविक्रमादित्य सचिन तेंडुलकरलाही ऑलिंपिकसाठी जाणाऱ्या 'टीम इंडिया'चा सदिच्छादूत होण्याची विनंती केली आहे. येत्या काळात ते आणखीही काही सेलिब्रिटींना सदिच्छादूत करू शकतात.

आंतरराष्ट्रीय क्रिकेटच्या मैदानात भारताचा झेंडा डौलानं फडकवण्यात मास्टर ब्लास्टर सचिन तेंडुलकरचं मोठं योगदान आहे. तो महान क्रिकेटपटू आहेच; पण एक विनम्र आणि सज्जन माणूस म्हणूनही त्यानं स्वतःची ओळख निर्माण केलीय. त्याची ही प्रतिमा आणि क्रीडाक्षेत्राबद्दल त्याला असलेली आस्था लक्षात घेऊन, भारतीय ऑलिंपिक समितीनं त्याला रिओ ऑलिंपिकचा सदिच्छादूत होण्याची गळ घातली आहे. समितीनं सचिनला त्याबाबत एक पत्र पाठवलंय. त्याला सचिनकडून होकार येणार का, याबद्दल क्रीडाविश्वात उत्सुकता आहे. संगीतकार ए आर रहमानलाही त्यांनी सदिच्छादूतपदासाठी विनंती केल्याचं समजतं.

दरम्यान, याआधी ऑलिंपिक समितीनं सदिच्छादूत म्हणून 'दबंग' सलमानची निवड केली आहे. त्याबद्दल ज्येष्ठ धावपटू मिल्खा सिंग आणि कुस्तीपटू योगेश्वर दत्त यांनी नाराजी व्यक्त केली होती. क्रीडाक्षेत्रात सचिन तेंडुलकर, पी टी उषा, राज्यवर्धन राठोड यांच्यासारखे खेळाडू असताना इतर क्षेत्रातील व्यक्तीला अॅम्बेसेडर नेमायची गरजच काय?, असा सवाल त्यांनी केला होता. तर, अभिनव बिंद्रासारख्या काही क्रीडापटूंनी सलमानच्या नियुक्तीचं स्वागत केलं होतं. या वादानंतर, आणखीही काही 'गुडविल अॅम्बेसेडर' नेमणार असल्याचं ऑलिंपिक समितीनं स्पष्ट केलं होतं. त्यानुसारच आता त्यांनी सचिनला पत्र पाठवलंय.