मुंबई : द्वितीय मानांकित ताजिकिस्तानचा ग्रँडमास्टर अमोनातोव फारूखने (इलो २६२४) मुंबई महापौर चषक आंतरराष्ट्रीय अ विभाग बुद्धिबळ स्पर्धा जिंकली. मुंबई उपनगर जिल्हा बुद्धिबळ संघटना व व्हिनस चेस अकादमी आयोजित स्पर्धेमधील निर्णायक दहाव्या फेरी अखेर ताजिकिस्तानचा फारुख अमोनातोव व दहावा मानांकित आर्मेनियाचा ग्रँडमास्टर पेट्रोस्यांन मॅनुएल (इलो २५७३) यांचे प्रत्येकी ८ गुण झाले. परंतु सरस टायब्रेकरमध्ये फारूखने बाजी मारली व मुंबई महापौर चषकावर सलग दुसऱ्यांदा आपले नाव कोरले. विजेतेपदासह फारूखने रु. ३,३०,०००/- रोख बक्षीस खिशात टाकले. उपविजेता मॅन्युएलने रु. २,३०,०००/- रक्कमेसह अंतिम उपविजेत्या चषकाचा पुरस्कार पटकाविला. परदेशी ग्रँडमास्टरांच्या मक्तेदारीत टॉप-१० पुरस्कारांमध्ये २५ वा मानांकित तामिळनाडूचा ग्रँडमास्टर आर.आर. लक्ष्मणने ७.५ गुणांसह (इलो २४३७) दहाव्या क्रमांकाच्या पुरस्कारावर भारतातर्फे मोहोर उमटवली.
कबड्डी पंचप्रशिक्षण
मुंबई : मुंबई उपनगर कबड्डी असोसिएशनच्या वतीने २३ व २३ जून रोजी कबड्डी पंच प्रशिक्षण शिबिराचे आयोजन करण्यात आले आहे. श्रमसाफल्य राष्ट्रीय मिल मजदूर संघ भवन सभागृह, खंडाळा येथे हे शिबीर होईल. या पंचप्रशिक्षण वर्गास महाराष्ट्र राज्य कबड्डी असोसिएशनचे सरकार्यवाह रवींद्र देसाई मार्गदर्शन करतील. संपर्क : प्रभाकर लकेश्री ९९६९२८१०७८