म. टा. क्रीडा प्रतिनिधी, नागपूर
जय साई वेल्फेअर फाउंडेशनतर्फे नागपूर जिल्हा बुद्धिबळ संघटनेच्या सहकार्याने आयोजित अखिल भारतीय जलदगती बुद्धिबळ स्पर्धेत आयसीएफचा ग्रॅण्डमास्टर आर. आर. लक्ष्मण विजेता ठरला.
कोराडी-नांदा मार्गावरील नैवेद्यम नॉर्थस्टार येथे ही स्पर्धा आयोजित करण्यात आली होती. स्पर्धेतील अंतिम म्हणजे, नवव्या फेरीत पहिल्या पटावर फिडे मास्टर नागपूरच्या शैलेश द्रविडने ७.५ गुणांसह एकमेव आघाडीवर असलेल्या आंतरराष्ट्रीय मास्टर तेलंगणाचा साई अग्नी जिवतेशला आणि दुसऱ्या पटावर ग्रॅण्डमास्टर आयसीएफच्या आर. आर. लक्ष्मणने महाराष्ट्राच्या क्षितिज मुदलियारला पराभूत केले. त्यामुळे शैलेश व लक्ष्मणची गुणसंख्या ८ अशी सारखी झाली. त्यामुळे अंतिम निकासाठी मुख्य पंच स्वप्नील बन्सोड यांना तांत्रिक गुणांची मदत घ्यावी लागली. तांत्रिक गुणसंख्येत लक्ष्मण सरस ठरल्याने तो विजेतेपदाचा मानकरी ठरला तर शैलेशला द्वितीय स्थानावर समाधान मानावे लागले. अन्य तीन खेळाडूंची गुणसंख्या ७.५ अशी सारखीच राहिल्यामुळे तांत्रिक गुणांच्या आधारे आंतरराष्ट्रीय मास्टर महाराष्ट्राचा मोहम्मद नबीरशाह शेखला तिसरे, तेलंगणाच्या साई अग्नी जिवतेश चौथे व महाराष्ट्राच्या जय सव्वालाखेला पाचवे स्थान देण्यात आले.
पुरस्कार वितरण सोहळ्यात प्रमुख अतिथी म्हणून मनपा क्रीडा अधिकारी पीयूष आंबुलकर,नैवेद्यम नॉर्थस्टारचे मनीष तिवारी, स्पर्धेचे मुख्य पंच स्वप्नील बन्सोड, स्पर्धा सचिव उमेश पानबुडे व जय साई वेल्फेअर फाउंडेशनचे सचिव सुशांत जुमडे उपस्थित होते. मान्यवरांच्या हस्ते मुख्य स्पर्धेत विजेत्या आर. आर. लक्ष्मणला ३६ हजार ५०० रुपये व चषक प्रदान करण्यात आले. दुसऱ्या ते २० व्या स्थानावरील बुद्धिबळपटूंना रोख पुरस्कार देण्यात आले. ० ते १२००, १२०१ ते १४००, १४०१ ते १६०० दरम्यान रेटिंग असलेल्या आणि वयोवृद्ध, महिला व नागपूरच्या बुद्धिबळपटूंना रोख पुरस्कार देण्यात आले. याबरोबर ७, ९, ११, १३ व १५ वर्षांखालील मुला-मुलींमध्ये उत्कृष्ट कामगिरी करणाऱ्या खेळाडूंना चषक देऊन गौरविण्यात आले.
निकाल (अंतिम फेरीत) : शैलेश द्रविड (८) मात साई अग्नी जिवतेश (७.५), क्षीतिज मुदलियार (७) पराभूत आर. आर. लक्ष्मण (८), संकल्प गुप्ता (७) बरोबरी मोहम्मद नबीरशाह शेख (७.५), प्रियांशू पाटील (७) बरोबरी सिद्धांत गवई (७), जय सव्वालाखे (७.५) मात वेदांत भारद्वाज (६), पी. गिरीनाथ (७) मात यश मारसट्टीवार (६), वैभव राऊत (७) मात सलिल देवगडे (६), प्रसन्नकुमार नायक (६) पराभूत सुजल जैस्वाल (७), विवान सरावगी (६) पराभूत सौरभ लोखंडे (७), अंश धनविज (७) मात मयूर शेळके (६), आरुष चित्रे (६.५) बरोबरी शनमुख पल्ल्ली (६.५), गीतेश मिश्रा (६) बरोबर व्ही. के. श्रीवास्तव (६).
..........