गुजरातची घोडदौड कायम

लखनऊ ः फजल अत्राचलीच्या जबरदस्त पकडींच्या जोरावर गुजरात फॉर्च्युनजायंट्सने मंगळवारी प्रो-कबड्डी लीगमध्ये पुणेरी पलटणवर ३५-२१ असा विजय नोंदवून घोडदौड कायम राखली. या खणखणीत बचावामुळे पुण्याची चांगलीच कोंडी झाली. ही कोंडी त्यांना या सामन्यात तरी सोडवणे जमले नाही.

बाबू बनारसी दास स्टेडियममध्ये हा चौथा टप्पा सुरू आहे. चौथ्या टप्प्यातील एका दिवसाच्या विश्रांतीनंतर पुणेरी पलटन आणि गुजरात फॉर्च्युनजायंट्स हे संघ आमनेसामने होते. गेल्या सहा सामन्यांत गुजरात फॉर्च्युनजायंट्स संघ अपराजित होता. गेल्या लढतीत गतविजेत्या पटना पायरेट्सला हरविल्यामुळे पुण्याचा आत्मविश्वास दुणावलेला होता. पुणेरी पलटण आपली लखनऊ मोहिमेची विजयाने सांगता करण्यास उत्सुक होता.

सचिनने बोनस गुण मिळवीत गुजरातचे खाते उघडले. त्यापाठोपाठ फझल अत्राचलीने पुणेरी पलटणच्या दीपक हुडाची पकड करत गुजरातला धडाक्यात सुरुवात करून दिली. झियाउरचा सुकेश हेगडेची पकड करण्याचा प्रयत्न फसला आणि पाहता पाहता गुजरातने ५-२ अशी आघाडी मिळविली. अत्राचलीच्या भक्कम बचावाच्या जोरावर गुजरातने लढतीवर पकड मिळविण्यास सुरुवात केली. मध्यंतराला गुजरात फॉर्च्युनजायंट्सने १६-७ अशी आघाडी घेतली होती. धर्मराज चेरलाथन आणि झियाउर यांच्याकडून बचावातील चुकांचा फटका पुणेरी पलटणला बसला. दुसरीकडे, सुकेश हेगडे आणि सचिन यांनी सुरेख चढाया केल्या.

उत्तरार्धातील तिसऱ्याच मिनिटाला रोहितकुमार चौधरीची पकड करण्याचा अत्राचलीचा प्रयत्न फसला. त्यानंतर दीपक हूडाने चढाईत अबोझार मिघानीला बाद केले. त्या वेळी गुजरात संघाचे दोन्ही इराणीयन बचावपटू बाहेर होते. अर्थात, पुणेरी पलटणसाठी संधी होती. मात्र, गुजरातने पकड गमावली नाही.

अखेरच्या टप्प्यात पुणेरी पलटणने झुंज दिली. मात्र, भक्कम बचावाच्या जोरावर गुजरात संघाने पुणेरी पलटणवर आणखी एक लोण चढवून विजयावर शिक्कामोर्तब केले. गुजरात फॉर्च्युनजायंट्स संघ सुरूवातीपासून आत्मविश्वासाने खेळला, त्या तुलनेत पुणेरी पलटणचा संघ दडपणाखाली खेळल्याचे जाणवले. फझल अत्राचली, अबोझार मिघानी या इराणीयन जोडीच्या भक्कम बचावाला परवेश भैन्सवालने मोलाची साथ दिली. दुसरीकडे, पुणेरी पलटणकडून दीपक हूडा, संदीप नरवाल, गिरीश एरनाख, गुरूनाथ मोरे यांनी दिलेली लढत अपुरी पडली.