गुजरातने केली जयपूरची पकड

जयपूर – चढाईपेक्षा पकडीत यश मिळवण्याची योजना जयपूर पिंक पँथर्सने आखली खरी, पण गुजरात फॉर्च्युनजायंट्सच्या चढाईपटूंनी त्यांच्या या योजनेवर पाणी फेरले. अखेरच्या मिनिटात गुजरातने जयपूरवर लोण चढविला आणि हाताशी आलेला विजय हुकणार नाही, याची काळजी घेतली. गुजरातने ही लढत २९-२३ अशी जिंकून प्रो-कबड्डी लीगमधील आपला धडाका कायम राखला.

सवाई मानसिंग इनडोअर स्टेडियममध्ये ही स्पर्धा सुरू आहे. घरच्या मैदानावर खेळून जयपूर संघ आपली गाडी रूळावर आणण्यासाठी सज्ज झाला होता. दोन्ही संघांनी सावध सुरुवात केली. पहिल्या दहा मिनिटांत ५-५ अशी बरोबरी होती. यानंतरही दोन्ही संघांकडून काही फारशा आक्रमक चाली बघायला मिळाल्या नाहीत. त्यामुळे पहिल्या पंधरा मिनिटांचा खेळ कंटाळवाणाच झाला. मध्यंतराला ११-११ अशी बरोबरी होती. उत्तरार्धात जयपूरने चढाईपेक्षा पकडीत गुण मिळवण्यास सुरुवात केली. अखेरच्या सहा मिनिटांत जयपूरने दोन वेळा सुपर टॅकल करून पिछाडी भरून काढण्याचा प्रयत्न केला. अखेरच्या ७० सेकंदांचा खेळ शिल्लक असताना गुजरातकडे २४-२२ अशी आघाडी होती. मात्र, यानंतर जयपूरला लोण स्वीकारावा लागला. त्यामुळे घरच्या मैदानावर विजयी सलामी देण्याचे त्या संघाचे स्वप्न काही साकार होऊ शकले नाही.

जयपूरच्या पवनकुमारला चढाईत केवळ ४ गुण मिळवता आले, तर दुखापतीतून सावरून संघात दाखल झालेल्या जसवीरसिंगने निराशा केली. गुजरातने पुन्हा एकदा सांघिक खेळ करून विजयाचा धडाका कायम राखला. गुजरातचा हा १९ लढतींत बारावा विजय ठरला. गुजरात संघ ७२ गुणांसह अव्वल स्थानावर आहे. जयपूरचा हा १६ सामन्यांतील आठवा पराभव ठरला.